ORANJESTAD – Na apertura di un conferencia internacional di inteligencia, Prome Minister Eman a bisa cu pa un pais baha su criminalidad y percura pa siguridad, mester traha pa crea un comunidad unda tur hende tin oportunidad igual pa por avansa. E siman cu ta tras di lomba e Conferencia di Comunidad Latino America y del Caribe de Inteligencia Policial (CLACIP) a tuma lugar, unda Prome Minister di Aruba, Mike Eman, hunto cu Minister di Husticia, Arthur Dowers, tabata invitado na su apertura.
Despues di gradici e organisadornan pa scoge Aruba como sede di e Cumbre Policial aki, e mandatario a papia di e siguridad y trankilidad pa cual e isla ta conoci p’e, sin ignora e retonan cu esaki tin tambe. “Siguridad ta relativo. En comparacion cu hopi pais, nos ta hopi sigur. Nos ta un isla di gran trankilidad, cu un esfera di harmonia den nos sociedad. Pero ora di haci comparacion pa e deseonan cu tin pa futuro di e pais, continuamente nos ta enfrenta retonan pa garantisa mas siguridad.”
Tambe el a menciona cu e trabou cu tur autoridadnan concerni tin pa traha riba nan, tambe tin e tarea di combatimento, di haci trabou intensivo di inteligencia y prevencion. Como Gobernante tambe el a bisa di tin un responsabilidad grandi pa percura cu e sociedad cu ta desea na Aruba, ta uno cu ta produci menos motibo pa criminalidad, menos motibo pa hobennan kere cu tin otro forma pa haya felicidad y oportunidad di un forma facil, contrario na esun di un bon ciudadano. El a recorda cu algun aña atras a haci un reflexion profundo riba e tipo di sociedad cu kier pa e pais, con ta bay avansa e prosperidad di e isla, con pa garantisa cu tin oportunidad pa tur hende, pero cu tambe tin un sentido di reparticion husto bou di e sociedad, Prome Minister Eman a bisa. El a sigui splica cu si mira e situacion na mundo, hopi di e motibonan di intrankilidad, ta e sentido di inhusticia cu ta sinti bou di e poblacion. “Hopi biaha e hendenan ta sinti cu nan no tin oportunidad igual den e oportunidadnan cu tin den e pais, cu nan no tin oportunidad di avansa den estudio of carera. Hopi biaha den paisnan unda cu tin hopi desafio di criminalidad tin pobresa, tin situacionnan cu ta causa un sentidad di intrankilidad, cu e hendenan ta pensa cu nan no ta conta den e sociedad, hincando nan mes den un situacion di desesperacion.”
E situacion ariba menciona, e mandatario a bisa, ta algo cu nan a identifica hopi tempran den desaroyo di e pais. Pesey mientras cu ta organisa e evento den un hotel di 5 strea, a haci un reflexion pa bini cu un maneho di 5 strea pa e barionan, scolnan, hospital, etc. Un situacion cu tin oportunidad pa desaroyo economico y tur hende por participa den e oportunidadnan cu tin. Pesey, si haci un comparacion cu otro paisnan den Caribe, Aruba ta un paraiso. Den tur esaki, no ta lubida riba e retonan, manera un efectivo control di e frontera di e pais, den cual Inteligencia ta hunga un rol hopi importante.