Home Uncategorized Club Primavera y Estudiantes a cuminsa cu nan mini cancha deportivo Prome...

Club Primavera y Estudiantes a cuminsa cu nan mini cancha deportivo Prome Minister Eman: “Nos ta contento cu e muchanan tin un sitio positivo pa recrea nan mes”

SHARE

ORANJESTAD – Tanto directiva di Club Primavera como esun di SV Estudiantes cu a uni, tin plannan grandi pa desaroya nan facilidadnan. E  oferta cu a yega for di COA via Gobierno pa construccion di un mini cancha deportivo, cu yerba artificial, a cay den bon tera. Prome Minister Mike Eman tabata di bishita na Primavera diahuebs atardi pa mira inicio di e trabounan di cobamento pa prepara fundeshi di e mini-cancha.

Rondona pa e hoben futbolistanan di e ekipo Estudiantes Prome Minister Eman a expresa cu e ta corda bon cla ainda su bishita den e bario algo mas cu un aña pasa, pero a combersa cu directiva di e club cu a duna e mandatario un presentacion di nan ideanan pa e club como di e team Estudiantes. Esaki tabata encera modificacion di e actual tereno, debi na construccion di Watty Vos Blvd. Naturalmente cu e tempo ey caba a papia di un cancha deportivo di yerba cu ta soño di e miembronan. “E tabata un pensamento cu Gobierno sigur ta para su tras y nos a logra den cooperacion cu Comite Olimpico haya acceso na fondo cu cual ta bay realisa cierto cantidad di mini cancha deportivo cu yerba den diferente bario. Club Primavera y Estudiantes ta un di e organisacionnan cu nos a sinti e amor y dedicacion pa deporte, pero tambe mirando e cantidad di muchanan cu ta haci uzo di e facilidadnan aki, sigur merece apoyo di Gobierno. Pesey awe nos ta para aki, unda ta poniendo e prome pasonan pa construccion di e mini cancha deportivo.”  

E mandatario a bisa tambe cu Gobierno  ta spera cu e trabou por wordo  realisa rapido pa denter di algun siman e ta bek na e sitio pa su inauguracion. Un cancha asina sigur ta haci e hungado y dirigentenan, pero tambe Gobierno, hopi contento. “E ta algo hopi concreto cu por duna pa e muchanan por tin un sitio positivo di recreo. E ta un hecho cu ora muchanan tin luganan positivo di recreo, ta desvia nan for di cualkier otro cosnan cu no ta bon pa nan desaroyo y formacion. Unda cu nos por yuda den esey, nos ta hacie cu placer,” e mandario a bisa. El a splica tambe cu BoBario ta un departamento cu ta cay bou di su Ministerio  cu a cana den hopi bario ultimo añanan, tumando deseo y sugerencia di e ciudadanonan. Basa riba esaki nos ta bay cumpliendo sea cu luz den bario, caretera, cancha deportivo, batting cage, cu ta cosnan cu nos a scucha e habitantenan pidi. Esaki ta nos hopi orguyoso y contento, y awe un pabien na Club Primavera y Estudiantes.”

E hobencitonan presente tabata hopi entusiasma y a gradici Prome Minister Eman, pasobra aworaki nan por hunga riba un cancha cu yerba. Pero tambe cu e por yuda nan avansa den nan tecnicanan.