Home Uncategorized Kenny Montero (POR) cu charlanan durante vakantie Inculcando bon ehempel den cuido...

Kenny Montero (POR) cu charlanan durante vakantie Inculcando bon ehempel den cuido y amor pa nos animalnan cerca nos muchanan.

SHARE

Durante temporada di vakantie candidato riba lista di POR e agente policial Kenny Montero, a ricibi peticion pa duna diferente presentacion na scolnan y diferente camp nan. A enfoca riba e conscientisacion di cuido di bestianan (di cas) cerca muchanan. “Mi ta kere den e pensamento ‘jong geleerd is oud gedaan’ y esaki mi ta aplicando tambe ya pa un tempo, pa asina logra inculca un custumber den comunidad con ta cuida bestianan di cas y ta un doño responsabel.”

E scolnan cu a bishita recientemente ta Peuterschool en naschoolse opvang De Schatkist y Contento Camp. Durante di e diferente presentacionnan ta splica e muchanan di e importancia di cuido di bestia y tambe e responsabilidad cu tin un mascota ta trese cu ne. Mester percura cu tin cuminda cu e nutrientenan necesario pa un bon salud di e animalnan, esaki ta ensera no duna animalnan cuminda di cas, luga apto pa sconde pa solo y awacero, su cuido veterinario entre otro ora nan ta sufriendo un quebrante di salud y cadena suficientemente largo si ta un mascota cu ta mara. Tambe ta splicanan pa reconoce sintomanan ora un cacho ta malo y pa nan avisa nan mayornan, pa asina hiba e cacho pa ricibi e tratamento medico necesario.

E charlanan ta hopi interactivo, caminda e mucha door di haci preguntanan ta ricibi mas tanto informacion y asina ta capta atencion di e muchanan y manten’e e atencion tambe. Kenny ta convensi cu si kier mira un cambio  den e manera con nos animalnan ta wordo trata awendia, mester cuminsa na nos muchanan.

“Te cu aworaki e recepcion pa loke ta informacion riba e tema aki ta bayendo hopi bon y e leider y leidsternan di dicho scolnan ta contento cu e presentacion cu nos ta duna. Zoraida Conijn ta miembro di un fundacion, pues e tin amplio conocemento di locual ta encera e materia y situacion di animalnan y e tambe ta yuda duna presentacion.

Tambe e juffrouw Karenza Werleman, kende cu ta un studiante di I.P.A. y a haci un projecto encuanto trato di nos animalnan masha bunita mes y hopi informativo.

Como candidato riba lista di POR mi ta un agente policial tambe full time y dunando presentacion na nos muchanan, ta laganan yega mas cerca di polis tambe.

Ta cambia e pensamento cu tin den comunidad y mustra cu polis no ta e “Boeman” cu ta sera hende so. Polis ta un hende cu bon curasin, cu bo por yega cerca di dje y por papia cu ne facil. Esaki ta cuadra tambe cu e mision di E Forsa Nobo cu kier pa polisnan yega mas cerca di comunidad.