POR, E Forsa Nobo, tin e distinto honor di anuncia un candidato nobo cu ta para fuerte pa cambio den sector di cuido Aki na Aruba. Dr. Mercedes Rivera tin un trayectoria largo y indiscutibel como internista riba nos isla. Como candidato pa proximo eleccion e kier enfoka tur su conocemento y energia den pone enfasis riba prevencion y eficiencia den cuido.
Dr. Rivera a nace na 1963 na Mexico den un famia den cual medicina ta central. Su mama ta pediatra, su ruman ta dokter, su tio ta internista, su primonan ta genetista y su wela tabata hefe di enfermeria na e hospital mas grandi den e ciudad mas grandi na mundo, Mexico DF. For di chikito ela wordo inspira pa medicina, cu cuido y trato di hende como punto cardinal, y asina e mes tambe a bay studia medicina na Universidad Nacional Autonoma de Mexico, cuminsando su estudio na 1979 y terminando su specialisacion na 1991 como internista y cardiologa. Amor ta loque a trece na Aruba na 1996, na unda ela lanta un famia y a continua su carera como medico. Tabata epoca prome cu AZV a wordo introduci, y Dr. Rivera den su practica tabata atende exclusivamente pashentnan cu e asina yama PPK-kaart. Esakinan tabata pashentnan di menos recurso y cu edad avansa of un handicap, pero den hopi caso tambe tabata lucha contra adiccion y probleman social.
Aunke e situacion di seguro pa cuido prome cu introduccion di AZV sigur tabatin su aspectonan discriminatorio contra esnan mas debil den sociedad, tabatin hopi mas contacto y cooperacion entre sector di cuido y departamentonan cu ta atende cu asuntonan social. Sinembargo, unabes cu AZV a wordo introduci na 2001 esaki a cambia drasticamente. Cuido medico pa net esnan mas vulnerabel y esnan cu lamentablemente a haya nan mes den mal caminda a practicamente cay afo. Tin un falta di conneccion entre AZV y problemanan social den nos comunidad. Esaki ta bin pa gran parti pasobra e sistema di salubridad publico no ta wordo guia cu perspectiva local pero segun e sistema Hulandes, cual no a wordo adapta na nos cultura y problemanan medico cu tipicamente ta toca nos Arubianonan.
Maneho den cuido hopi biaha ta wordo dicidi pa un comision di hunta di AZV cu no ta den contacto directo cu expertonan y dunadonan di cuido riba e veld. Cuido medico general riba su mes ta hopi caro. Actualmente seguro ta dicidi riba cuido y no e dokternan, poniendo consideracionnan economico na prome luga enbez di busca e miho solucion na condicionnan existente. Dr. Rivera ta haya cu net consulta cu e dunadornan di cuido y un enfoke riba prevencion ta loke lo baha gastonan y alaves garantisa un cuido di miho calidad pa nos tur. Aworaki ta manda dokternan cu hopi experiencia y conocemento practico cas unabes cu nan yega edad di 65 aña, en bes di laganan fungi como consehero, funcion cu nan siguramente lo por haci miho cu e bedrijfsartsen y farmacistanan cu awo ta dicidi riba aprobacion di tratamento y remedi – decisionnan riba bida di otronan – a base di website y buki. Fuera di esaki, e departamento di keho di AZV no ta yuda activamente pa soluciona problemanan di pashent. pero e problema mas grandi ta cu AZV no ta pone enfasis riba prevencion. Hopi placa ta bay den manda hende afo, pero hopi di e casonan aki lo por a wordo preveni caba si e maneho tabata stimula tratamento preventivo y proactivo. E conflicto cu a conduci na terminacion di contracto di Dr. Rivera ta producto di esaki. Supuestamente, Dr. Rivera lo tabata ‘laga haci mucho test’. Compara e gasto di testnan cu ta yuda pa yega na un diagnosis y tratamento mas fiho pa por ehempel presion halto y sucu y gasto di manda hende afo of di un opname di un aña pa via di un stroke pasobra no a trata e condicion na un manera preventivo hopi mas prome cu pilder.
Dr. Mercedes Rivera su pakete di solucion ta pa cuminsa tene mihor contacto entre AZV y dokternan y pa evalua structura di comisionnan pa asina yega na un approach mas proactivo y cu hendenan califica tumando decisionnan den dunamento di tratamento. Cuido ta caro. Recursonan mester wordo usa intelligentemente, tumando problematicanan local y genetico di nos Arubianonan, manera por ehempel obesidad, malnutricion, STD’s, cancer y problemanan di curason na cuenta, no djis segun un website Hulandes. Prevencion ta escencial pa Dr. Rivera. Mester detecta problemanan y traha den forma preventivo. Mester institui un sistema digital den cual dokternan di cas ta colecta data di pashent y for di cual por conclui tendencianan. Pashentnan tambe mester carga responsabilidad pa laga sa di su condicionnan existente na dokternan di cas. Fuera di esaki, dokternan di cas mester keda actualisa nan mes cada aña cu cursonan pa keda up to date. Finalmente, nos sistema di cuido actualmente ta discriminando nos dokternan y studiantenan cu a studia na otro caminda cu Hulanda. Dr. Rivera ta di opinion cu AruBig mester por funciona. Tur esaki ta constitui un reto enorme pa e proximo gobierno pa cual nos pueblo ta bay vota riba 22 di september. Cu Dr. Mercedes Rivera awo riba lista, POR su team ta mas cu cla pa gara e reto aki na su cacho. Cu Dr. Rivera, Aruba sigur POR!