Home » Parlamentario mr. Juan Ady Thijsen (MEP): MEP lo drecha bek tur loke AVP a danja riba e mercado laboral poniendo e persona local bek na prome luga.

Parlamentario mr. Juan Ady Thijsen (MEP): MEP lo drecha bek tur loke AVP a danja riba e mercado laboral poniendo e persona local bek na prome luga.

by sxm
0 comment 52 views

Parlamentario mr. Juan Ady Thijsen ta consciente cu como consecuencia di e mal maneho di ex Ministro di Labor Otmar Oduber y e falta di maneho di Ministro sospechoso Paul Croes tin varios asunto riba e mercado laboral cu no ta cana bon. 

Segun Parlamentario mr. Juan Ady Thijsen AVP a haci un desaster cu e mercado laboral. En bes di cu e hende local ta na prome luga AVP a introduci reglanan nobo. Trahado ilegal di yega tera y trahado ilegal turista ta bai prome cu e trahado extranhero cu ya tin anjanan ta biba na Aruba cu permiso. Esun cu permiso ta bai prome esun cu ya ta local y esnan naci na Aruba. Esaki ta mas tanto den e ramonan den prome linea. Pa loke ta toca trabaonan di supervisor te cu general management ya tin full un mercado di trahadornan di afo, mas halto e funcion ta menos chens tin cu e ta un hende local. Segun Parlamentario mr. Juan Ady Thijsen esaki nos no por sigui asina. Ta bin acerca cu gobierno mes a crea full un ambiente di desmotivacion. Hobennan ta bai dedica nan tempo y haciendo debe pa logra un diploma, mientras coordinadornan ta gana salario mas halto cu jefenan di departamentonan di gobierno.

Segun Parlamentario mr. Juan Ady Thijsen MEP su punto di salida ta cu empleo mester ta na prome lugar pa nos hendenan local. Pero si no tin hende local anto mester yega na proceduranan di permiso di trabao menos complica, transparente y menos costoso.  Den cuadra di esaki ta pensa di separa e autoridad di duna permiso esta Ministro di Husticia pa verblijfsvergunning y introduci werkvergunning apart cerca Ministro di Labor.  Lo hiba un maneho di crea hopi empleo nobo pa nos hendenan cu no kier traha den sector hotelero ni petrolero. Lo traha hopi estrecho cu Departamento di Ensejanza pa un manpowerplanning pa sigiuente decada. Gobierno mester percura pa un databank up to date di hendenan cu ta busca trabao of mihor trabao, muchanan cu ta of ta bai caba scol tanto na Aruba como den exterior y un registracion di Arubianonan full rond di mundo cu nan estudio y experiencia. Den cuadra di duna funcionnan halto bek na nos hende local lo introduci un plan di reemplazo (vervangingsplan). Hoger kader ta cinco anja pa prepara un hende local pa por ehemplo General Manager, middenkader (por ehemplo Food & Beverage Manager) ta 3 anja y lager kader ta 18 luna. Esaki ta encera cu durante un periodo e donjo di trabao ta haya un permiso pa un trahador di afo pero dentro di e tempo stipula mester prepara un reemplazo local.  Pa loke ta toca personanan di exterior cu kier bira local lo introduci un path pa citizenship na unda un caminda cu condicionnan ta ser stipula pa e cana si e kier bira local definitivamente.

Pa loke ta trata control pa ilegalnan MEP lo hiba un maneho cu Departamento di Labor ta controla na pia di trabao y Warda Nos Costa ariba caya y lugarnan publico. Pa trahadornan di 50+ MEP ta pensa tambe riba incentivanan fiscal pa yuda e personanan aki haya trabao mas lihe. E maneho di empleo lo ta pa stimula tambe trahador di sector priva pa lanta nan mesun empresa y tambe lo stimula trahadornan publico pa den sector priva sea como trahador of empresario. Parlamentario mr. Juan Ady Thijsen ta kere pa maneha e mercado laboral miho lo mester introduci instrumentonan pa por hiba maneho salarial. Actual ley solamente ta prescribi un sueldo minimo cu ta conta pa tur sector y esaki no ta funcionando. Den cuadra di esaki lo studia e posibilidad di re-introduci salario minimo pa sector. Parlamentario mr. Juan Ady Thijsen ta pidi tur hende sigui desaroyonan di cerca y sigur duna sosten pa medio di voto pa por logra e cambionan riba mercado laboral. Parlamentario mr. Juan Ady Thijsen y Partido MEP ta cla pa e retonan grandi. Hunto p’e cambio sin miedo.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio