Diahuebs mainta, riba red social, Rocco Tjon a anuncia cu e ta subi lista di partido MEP pa Eleccion 2017.
Rocco Tjon ta un hoben profesional, cu 16 aña di experiencia den e ramo di husticia. El a sirbi Aruba, prome como polis, caminda e ultimo funcion cu el a eherce den KPA tabata esun di chief of staff. Tambe el a sirbi como director na KIA y a pasa den ‘screenings’ riguroso pa por a ocupa e funcionnan aki.
Rocco a contribui tambe na mehoracion di e situacionnan social, cu ta den decadencia, a traves di fundacion “Helping Hand Foundation Aruba”.
Na prome instante, ora a acerca su persona pa drenta politica, e no tabata sigur si e mester tuma e paso aki, pero segun tempo tabata pasa, Rocco no por a sigui ignora e yamada pa drenta politica.
Rocco a subi riba lista di MEP pasobra e ta convenci cu e team di MEP tin e candidatonan cu experiencia y dedicacion, pa enfrenta e retonan difícil di nos país y cu experiencia no solamente politico, pero experiencia operacional den cada area y riba nivel strategico. Definitivamente un team di candidato bon studia y talentoso, cu hunto lo trece solucion y contribui na un miho Aruba. Y Rocco ta dicidi di forma parti di e team aki y ta parti di e cambio cu nos pueblo ta anhela.
Lider di MEP, Evelyn Wever-Croes, den nomber di Partido, ta yama bonbini na e candidato nobo, Rocco Tjon y a desea Rocco tur clase di éxito pa e reto cu tin su dilanti.
“Partido MEP ta conta cu un ekipo di lidernan nobo cu experticio den diferente areanan. Nos ta un partido cu ta demostra liderazgo cu vision. Cada candidato riba nos lista ta lidernan inspira, motiva y cu amor pa nan patria. MEP tin e liderazgo nobo cu Aruba merece.
Partido MEP ta yama bonbini na Rocco. Hunto Aruba henter ta bay p’e cambio”: tabata palabranan di Evelyn Wever-Croes na e ocasion aki.