Desde weekend caba nos a cuminsa ricibi informenan cu na algun cas den San Nicolas, Paradera y Hooiberg, banderanan di MEP a wordo vandalisa. Mesora a tuma contacto pa confirma e hecho, y a resulta cu ta berdad. E actonan di vandalismo a cuminsa despues di e actividad di AVP diabierna, y ta parse cu e hendenan a sali de remate.
“Mi ta condena vandalismo cu a wordo hasi contra materialnan politico y na casnan di hende, y mi ta lamenta cu esaki a pasa. Mi ta hasi un apelacion riba tur hende pa ban demostra comportacion civico y demostra respet, sin comete actonan di vandalismo. No solamente e ta un acto castigable, pero e ta hopi bergonsoso cu un partido no por contene su deseperacion y ta manda su simpatisantenan pa causa destruccion.
Mes momento mi ta hasi un apelacion tambe na nos simpatisantenan, pa no paga malo cu malo, y no recuri na e mesun vandalismo. Campaña pa MEP ta bayendo hopi bon, y probablemente esey mes ta e motibo pa cual oponentenan politico ta recuri na vandalismo. Nos no ta permiti ningun hende desvia nos atencion, y nos atencion ta dirigi den gana eleccion dia 22 di September.
Di nos parti, nos a tuma contacto cu autoridad policial, pa nan ta na altura, y nos ta spera cu autoridad policial tambe condena locual cu ta pasando, y actua cu man duro contra e malhechornan”, lider di MEP Evelyn Wever-Croes a duna di conose.