Home Uncategorized AIB a celebra cu edificio nobo a yega ringbalk

AIB a celebra cu edificio nobo a yega ringbalk

SHARE

ORANJESTAD, Aruba: AIB a expande su edificio y nan a yega te na e ringbalk y pa cu esaki e directiva hunto cu empleadonan y contratista a tene un evento di tradicional di ‘spantenbier’. AIB tin 10 aña ta huur un edificio pa su personal, pero e compania a crece. Nan a muda den e edificio original despues di a restaura esaki dia 1 di October 1998 y tin casi 20 aña cu nan a drenta den dje. Managing Director di AIB, Frendsel Giel, a splica cu hopi desaroyo a tuma luga y algun aña pasa nan a cumpra e edificio situa na Zuidstraat cu un tempo tabata sirbi como Museo Numismatico pa AIB.

 

Directiva di AIB kier pa tur hende traha hunto den forma eficiente y finalmente a tuma e decision di expande e banco. A agrega un parti nobo combinando e dos edificionan na e banco asina  tambe nan ta cumpli cu nan mision social – economico cu nan a ser funda pe, unda ta contribui na mantene nos  monumentonan. Diferente contratista a bid pa por traha riba e edificio, pero na final a bay cu contratista Aguirre Garcia & Sons N.V. Frendsel Giel a splica cu AIB a laga Monumentenbureau haci un analisis y a base di e criterio, a base di oferta di e contratista, nan a scoge pa contratista Aguirre.

 

Director di Monumentenbureau, Yvonne Webb-Kock, ta contento cu a yuda AIB. Monumentenbureau ta encarga cu tur monumento na Aruba y desde algun aña nan tin nan mesun departamento cu ta pinta mapa y prepara proyectonan di restauracion. Ora a tende cu AIB tabata evaluando pa traha un edificio pafo di Playa, a convence nan pa drecha e monumento patras di e edificio di AIB cu nan a adkiri. Asina lo conecta e edificio bieu cu e nobo. Monumentenbureau ta resorta bou di Minister di Cultura y nan mester a pidi permiso, pa nan por a traha riba e proyecto cu AIB. “AIB ta dunado di e tarea y Monumentenbureau ta e projectleider, architect y Directie voering di e proyecto”, el a indica.

 

Executive Manager Finance & Operation di AIB, Marcel Solagnier, a tabata e persona asigna pa lidera e proyecto pa sondea un edificio nobo na momento e necesidad a bin pa expande door di tin mas personal. A huur un edificio den Wilhelminastraat, mientras AIB a cuminsa mira un edificio completo na Sasaki y Oranjestad. Despues di basta consideracion, a dicidi cu nan lo keda den Oranjestad.

 

AIB a cumpra e edificio 5 aña pasa pa asina evalua e posibilidad pa expande e edificio y a realisa cu e ta un edificio riba lista di monumento. Considerando pa por renoba e edificio, a bin diferente exigencia adicional y gerencia tambe a pone su rekisitonan pa inverti pa asina e ta rendabel. Esey tabata e reto y AIB a invita e Monumentenbureau, kendenan a bin cu diferente diseño. Marcel Solagnier a expresa cu e diseñonan tabata hopi creativo y adecua pa nan uzo y den prijsnan aceptabel. E departamento di finansa y operacion tabatin e trabou pa convence gerencia riba algo diferente y a logra esey. E resultado ta cu e trabounan a yega na halto y AIB ta contento cu esaki.