Diamars pa mas o menos 8’or di mainta, algun trahador di Arugas cu tabata haya molester di e holor malo cu ta sali for di e planta di Ecotech a dicidi di pone trabou abou, paso nan a cansa y no ta soporta e holor desagradabel aki mas.
E ta un problema cu pa basta tempo ta andando y ta molestiando e trahadornan di Arugas cu ta traha pafor unda ta yena botternan di gas.
Awe e holor a bira hopi insoportabel, e trahadornan a fada y no por traha mas den e holor hopi desagradabel aki mas, cu nan a dicidi di pone trabou abou, e tabata asina horibel cu te hasta tres trahador a cuminsa sinti malo y mester a bay cas.
E gerencia di Arugas ta haciendo su best pa traha riba un solucion pa e problema aki, pero e ta moviendo hopi poco poco.
E trahadornan di Arugas ta den proceso pa bay firma un CAO nobo cu gerencia, den cual sigur e trahadornan lo bin cu algun punta cu nan kier pa haya atencion, incluiendo e problematica aki, cu siguramente mester haya su debido atencion for di gerencia.