Home Uncategorized MEP: MEP a bishita barionan di San Nicolas den entrada masal

MEP: MEP a bishita barionan di San Nicolas den entrada masal

SHARE

Den cada skina di nos pais, pueblo ta sintiendo e presencia di partido MEP. Candidatonan riba nos lista ta sigui activo tur dia bishitando cas pa cas den tur bario na Aruba presentando nos plan di accion y speransa pa e proximo gobernacion.

 

Den fin di siman Lider di Partido MEP, sra Evelyn Wever-Croes, hunto cu candidatonan y sostenedornan a drenta den un forma masal den barionan di San Nicolas. Cu cada bishita cu MEP a haci den barionan di San Nicolas den e ultimo lunanan pa presenta nos plan di solucion y scucha e nececidadnan di ciudadanonan di San Nicolas, nos ta keda convenci cu San Nicolas tambe kier cambio den e rumbo insigur cu nos pais ta bayendo.  

 

E pueblo di San Nicolas ta biba preocupa pa e insiguridad grandi cu ta reinando den nos pais cu tanto atraco cu ta tumando luga den e ultimo añanan. Criminalidad a subi no solamente hopi sino tambe hopi lihe.

 

Pa Partido MEP e preocupacion aki lo wordo atendi mesora cu nos ta den Gobierno. Cu nos plan cu nos ta bin ta anunciando, nos lo trece orden y respet bek. Movimiento Electoral di Pueblo su vision ta pa haci esaki den dos paso.

 

PASO 1:

  • Control estricto na nos fronteranan. • Bin bek cu radar y helicopter. • Duna Warda Nos Costa autoridad y material pa controla nos costanan.

 

PASO 2:

  • Combati criminalidad cu man duro.
  • Preveni crimen door di haci mas agente policial visible riba caya y den bario.
  • Intensifica proyecto Control di Camera.
  • Ilumina mas bario.
  • Reenforsa cuerponan di siguridad cu material y personal.
  • Percura pa participacion di profesionalnan den un Plataforma Nacional di

   Husticia y Siguridad.

  • Fortifica e siguridad den areanan turistico cu un “Tourism Police”.
  • Introduci e “Boton di Panico” pa duna un extra atencion na esnan

   mas vulnerabel pa cu criminalidad. 

 

Ta un alegria y satisfaccion hopi grandi pa nos partido cu e ricibimento cu e pueblo di San Nicolas a brinda nos tanto den nan hogar como tambe riba caya. Hopi chauffeur cu tabata pasa den nan auto a baha for di caminda pa saluda nos lider y candidatonan y alabes plak sticker riba nan auto. Algo cu tambe tabata remarcabel ta e cantidad di peticionnan di habitantenan di San Nicolas pa nos hisa bandera na nan propiedad, mustrando asina cu no tin miedo pa mustra nan color politico como tambe nan disgusto cu e gobierno actual.

 

MEP su compromiso cu Aruba ta pa pone e hende central atrobe. Hunto nos lo logra esaki. MEP lo ta drentando tur skina di Aruba cu nos mensahe di cambio. Aruba, Hunto p’e cambio! #sinmiedo