Durante 7 aña Otmar Oduber a ocupa e posicion di Minister encarga cu Sector Primario na Aruba. Durante e transcurso di e añanan aki conhuntamente cu esnan encarga cu e sector aki a traha hopi duro y a logra cosnan grandi pa cunukero, criado di bestia y piscadonan.
Pero ainda tin hopi trabou pa haci y e team di POR ta para pa un maneho pa mehora posicion di piscado, cunukero y criado di bestia dor di conscientisa y promove un sector primario avansa. Otmar Oduber ta indica cu promocion di cultivacion y consumo di producto local, ta un prioridad. “POR ta enfoca riba maneho pa tereno destina pa agricultura, piernan rond di nos isla, incentivisacion di sector primario cu leynan fiscal atractivo, sistema di permiso y control, uzo di energia alternativo y tecnologia moderno, stimula participacion mas grandi di nos comunidad, balorisacion di nos agricultornan, criadornan di bestia y piscadonan y un maneho integral di Santa Rosa. Ademas, POR lo stimula sector primario pa forma parti di e diversificacion economico di nos pais”.
E ta bisa cu crea un infrastructura basico pa sector primario y stimula diversificacion economico pa beneficia nos cunukeronan como tambe piscadonan y criadonan ta hopi importante. Esaki por wordo logra pa medio di un maneho integral como tambe uzo di tecnologia moderno.
Un aspecto hopi importante y cu pa hopi aña a keda pega ta e parti di huurgronden, pesey Otmar Oduber y POR ta bay duna prioridad na mehora maneho di huurgronden pa asina crea mas espacio pa por otorga tereno cu meta agricultural.
Tambe mediante Fundacion Centro di Pesca Hadicurari lo intensifica e programa di construccion y renovacion di pier tur rond di Aruba (Noord, Playa, Barcadera, Spaans Lagoen, Savaneta, Cura Cabay y San Nicolas) pa asina salvaguardia nos herencia y conscientisa encuanto ofishi di piscado.
Importante tambe ta pa restructura y reforsa Santa Rosa cu enfoke riba profesionalisacion como tambe crea laso estrecho y fuerte cu agricultornan y piscadonan. E trabou cu Santa Rosa y henter e team a bin ta realisando ta asina grandi y tabata esencial pa e avancenan grandisimo cu Aruba a conoce den sector primario, pesey ta importante pa haci e inversionnan aki den nos hendenan.
Durante su periodo como e minister encarga cu Sector Primario, Otmar Oduber a establece un maneho hunto cu Minister di Finansas pa loke ta tax holiday pa sector primario. Es decir por a importa material relaciona cu e ofishinan cu ta resorta bou sector primario sin cu mester a paga belasting riba esakinan. POR kier bay un stap mas leu y haci di e maneho aki un ley y di e forma aki stimula nos sector primario.
Tambe ta bay introduci un sistema di permiso electronico y limita pa pesca cu harpoen na aerenan designa leu for di coral, a base di cual por monitoria su condicion.
Finalmente, pero no menos importante a e introduccion di un tarifa special di awa di WEB, pa necesidad y uzo den sector primario. Lider di POR durante aproximadamente 2 aña a sostene reunionnan hunto cu Santa Rosa y WEB pa yega na tarifanan preferencial pa agricultornan y criadonan di bestia. E tempo aya a papia di un tarifa entre 3 pa 5 florin pa m3. E conversacionnan por a compronde a continua, pero ainda no a logra pa esaki drenta na vigor. POR lo logra esaki beneficiando y stimulando asina nos sector primario mientras cu lo crea mas damnan moderno pa amplia maneho di reserva di awa.