ORANJESTAD- Hunto cu su colega di Finanzas Minister Bermudez, Minister Richard Arends a reuni cu partnernan strategico pa frena e negoshi di gasolin for di Venezuela. Ta buscando un forma con combati e negoshi aki cu no solamente ta creando un situacion inhusto pa comerciantenan local, pero ta uno sumamente peligroso tambe. Henter un bario ta na peliger cu e gasolin cu ta wordo deposita den barionan habita ya cu esnan cu ta trece e gasolin no ta tene nan mes na reglanan y rekesitonan cu si ta conta pa doñonan di pomp di gasolin. Despues di e reunion Minister Richard Arends a splica kico a wordo papia y con ta bay atende cu e asunto aki.
Minister Arends: “Colega Bermudez y ami a sinta cu partnernan cu ta envolvi den e proceso di importacion di productonan. Nos a sinta cu Departamento di Asuntonan Economico, cu APA, ASTEC como compania priva, cu Douane, Douane Recherche y DTI. Nos a discuti e fenomeno di importacion di gasolin cu ta wordo exporta di Venezuela ilegalmente, pero ta drenta te cierto nivel di legalidad aki na Aruba.” Arends a enfatisa cu e peligernan cu e negoshi aki ta trece cu ne ta grandi pa e habitantenan di e bario unda e gasolin aki ta wordo bendi y yambe pa e usuarionan. Tambe el a splica cu e cantidad di liter di gasolin cu ta wordo importa ta igual na e liternan di gasolin cu un pomp aki na Aruba ta bende.
Minister Arends: “Pa garantisa un ‘level playing field’ pa e pompnan di gasolin na Aruba y tambe pa garantisa seguridad di habitantenan riba nos isla nos a sinta hunto pa mira unda y con frena e fenomeno aki, esta importacion di gasolin for di Venezuela. Nos a discuti e problema aki den e forma mas creativo cu tin y lo bay tin un siguiente reunion hunto cu Polis y Ministerio Publico pa wak con ta e miho forma di para e negoshi aki.” Arends a haci un yamada na pueblo di Aruba cu ta haci uso of ta participa na e sorto di negoshinan aki pa por fabor stop cu esaki. “No solamente bo ta haci algo cu ta ilegal, pero tambe bo ta pone bo bida y bida di habitantenan di Aruba na peliger dor di ta participe den e negoshi aki. Esaki ta e prome encuentro, lo sigui mas y dentro di poco nos ta anuncia e medidanan pa loke ta trata importacion di gasolin unda lo bay stream line e. Esaki ta un responsabilidad di gobierno y cada un di e stakeholdernan den e reunion ta actua segun ley.”
“Den ley semper tin vacuum unda otronan ta haya chens pa abusa di e espacio cu e legislador a laga atras. Banda di esaki mi ta kere cu obviamente durante añanan e interpretacion di e leynan a cambia y tambe tin hopi jurisprudencia. Nos por bay bek na loke e legislador a laga atras y frena importacion di gasolin aki na Aruba,” Arends a conclui bisando.