ORANJESTAD — Durante e debate di lidernan politico siman pasa, a elabora riba entre otro e tema di cuido di salud. Lider di MEP Evelyn Wever-Croes a contesta e pregunta “con lo corta e tempo di espera den cuido di salud”.
CORTA TEMPO DI ESPERA
Pa mehora e cuido di salud mester corta tempo di espera.
Pa corta e tempo cu un pacient mester warda pa mira specialista mester amplia e cantidad di specialista. Y si mester nos lo trese dokternan di exterior pa un temporada cortico, pa yuda nos propio profesionalnan wak e pacientnan. Una bes nan keda cla, nan lo bai bek y nos propio specialistanan lo sigi atende cu e pacientnan den un tempo relativamente cortico.
Naturlamente nos mester trese nos hobennan graduadonan den medicina den region bek pa traha na Aruba.
Pero no esey so. Mester amplia e orario di sala di operacion. Si tin suficiente personal y tin suficiente material pa hasi operacion, no mester warda tanto. Mescos ta conta pa e orario di hasi test manera scan, MRI, etc.
Pa logra esaki nos mester inverti mas den nos empleadonan y nan condicionnan laboral, pa hasi e trabou mas atractivo pa nos hobennan. Nos mester percura pa e estudio na EPI ta cualifica pa studiantenan por drenta y traha na Hospital mesora sin problema.
PREVENCION
Pa mehora e cuido riba termino largo nos mester enfoca mas riba prevencion. Importante ta pa hendenan biba saludable, pero esey ta casi impagable na Aruba. Pesey nos mester baha e prijs riba productonan saludable y educa nos cuidadanonan con pa biba un bida saludable.
MEP lo introdusi un chequeo obligatorio cada aña, pasobra asina bo por detecta problemanan den salud di trempan. Un riñon prome cu perde hopi di su funcionalidad, un bista prome cu Glaucoma bai cune, Cancer prome cu e bira mas grandi. Den tur e casonan aki e tratamento ta mucho mas efectivo y menos costoso si e malesa wordo detecta na tempo.
Cu salud di hende bo no ta hasi wega. Nos dokternan y profesionalnan ta hasiendo nan maximo esfuerso pa mantene e cuido na un nivel halto, pero nan mannan ta mara. MEP ta di opnion cu un pueblo salud y un pueblo educa por enfrenta tur retonan, y pesey cuido di salud lo haya prioridad. Nos lo cambia e enfoke di gobernacion cu awor ta riba estetica y embeyesemento, y pone e enfoke riba e ser humano, pasobra pa un pais progesa e ser humano mester ta salud pa e por progresa tambe.