Home Uncategorized Debi na medidanan revisa di seguridad door TSA entrante 19 di Juli,...

Debi na medidanan revisa di seguridad door TSA entrante 19 di Juli, 2017: Tur pasahero biahando pa Merca mester ta na aeropuerto 3 ora prome cu buelo

SHARE

ORANJESTAD – Recientemente TSA di Merca a ordena tur aerolinea cu ta bula pa Merca, pa implementa Medidanan di Seguridad Revisa riba tur pasahero cu ta biaha for di tur destinacion pa Merca.

Aruba Airport Authority N.V. (AAA), operador di Aeropuerto Internacional Reina Beatrix, ya tabata trahando cu e aerolineanan partner y otro stakeholdernan den e proceso y a haci e cambionan necesario pa cumpli cu e rekesitonan nobo.

Desde 19 di Juli, 2017 un lista nobo di Articulonan Prohibi / lista di Exempcion lo wordo implementa y biaheronan biahando for di Aruba pa Merca lo wordo someti na control/screening adicional di articulonan electronico personal, e asina yama “Personal Electronic Devices” (PED’s).

Aunke cu AAA y e aerolineanan a haci tur e areglonan necesario pa e rekesitonan nobo aki por cana mas suave y facil posibel pa e biahero, pasaheronan biahando pa Merca toch lo por experencia retraso den e proceso como consequencia di e rekesitonan nobo. Pa por yuda den caso di retraso, AAA ta encurasha tur pasahero biahando pa Merca pa percura pa ta na aeropuerto 3 ora prome cu nan orario di salida.  

Pasaheronan cu ta biahando pa Merca cu tin preocupacion tocante e transportacion di nan articulo electronico personal por tuma contacto cu nan aerolinea cu nan lo biaha cu ne pa mas detayes.