POR den proximo gobernacion lo percura pa scolnan ofrece mesun calidad di enseñansa pa tur hoben
Basa riba e rapport di Unesco, nos porcentahe di muchanan cu ta atende scol ta halto. Sin embargo, e cantidad di “drop-outs” ta alarmante. Por ehempel, 10% di adolescentenan no ta caba scol secundario. Fuera di esaki, a base di un encuesta cu organisadornan di e debate pa Millennials a haci, ta indica cu personanan ta di opinion cu e nivel di educacion a cay atras y cu posibilidadnan pa haya trabou despues di caba scol ta limita, algo cu POR tambe a constata den combersacion cu diferente hoben.
Durante di e debate di Millennials cu a tuma luga diahuebs den Cas di Cultura, lidernan mester a contesta si nan lo subi of baha e presupuesto anual di educacion y riba kico specifico lo desea di inverti, por ehempel riba calidad di docente, tecnologia na scol, infrastructura, of algo otro. Tambe mester a menciona con lo yega na e financiamento pa e accionnan aki?
Pa partido Puebo Orguyoso y Respeta e ta importante pa nos sistema di enseñansa completo bira uno cu ta inclusivo di berdad. “Hopi biaha nos ta segrega nos hobennan y limita nan oportunidadnan y ta stigmatisa e muchanan na scol cual ta pone nan perde cierto oportunidadnan den bida. Locual cu ta responsabel segun nos presupuesto ta locual cu nos mester por pone disponibel pa enseñansa y asina percura pa bienestar di e Pais y e futuro di e proximo generacion.” POR ta para pa “quality assurance program” unda cu scolnan a base di indicadornan ta midi nan mes y controla nan mes pa tur scol akinan na Aruba tin e mesun calidad di enseñansa pa tur hoben cu ta participa. Percura pa tin un “quality inspeccion” program caminda cu bo ta pone departamentonan di inspeccion hunto cu e scolnan pa por controla y vigila e calidad di enseñansa cu ta wordo spera di inspeccion. Tambe lo percura pa un tipo di leerlingvolgsysteem caminda cu mayornan, docentenan y maneho, tur na un forma digital ta conecta cu otro pa por sigui e proceso di e hobennan. Pa loke ta e problema di “drop-outs”, mester atende prome cu e yega asina leu. Por haci esaki si brinda e opcion pa tin “summer schools” y “rebound schools”, caminda e maestro ta haya e oportunidad di saca e mucha for di e klas y duna e mucha e atencion pa despues bin cu ne bek, sin cu e ta bay a costo di otro hobennan cu ta studiando den e mesun klas ey, sr. Oduber ta splica. Pa loke ta e maestronan tambe POR lo percura pa duna atencion na e situacion actual mester percura pa inverti den nos maestronan/docentenan. Percura pa nan wordo recompensa segun nan prestacion y elimina e situcion cu maestronan ta keda stagna y frustra den un funcion sin aumento di salario. Tambe ta hopi importante pa na scolnan basico tin docentenan dedica na cierto vaknan (p.e. Hulandes, Rekenen) ta esun cu ta duna e les. Mescos ta conta pa Gymnastiek cu mester wordo duna na scolnan basico door di personanan cu ta gradua den e materia aki. Finalmente e cambionan aki lo ta na beneficio di e propio hoben, sr. Oduber a termina bisando.