ORANJESTAD – Departamento di Obra Publico, compania Mota Engil y compania di utilidad Setar ta informa pueblo di Aruba en general y specialmente nos automobilistanan cu ta haci uzo di e caminda principal di Oranjestad pa Santa Cruz, cu na e rotonde provisional di Caya Betico Croes y Watty Vos Boulevard, cu diasabra, 15 di juli 2017, ta bay cera e rotonde provisional parcialmente pa trafico.
Setar tin trabounan pa haci relaciona cu e proyecto di Watty Vos Boulevard y pa motibo di esaki tin cu cera parti di e rotonde menciona.
Trafico for di Sta Cruz direccion Oranjestad/ Sabana Blanco ta wordo desvia via di e caminda di Cumana pa Meiveld y pasa patras di ex edificio di Codemsa y bolbe bek riba e caminda principal di direccion Oranjestad/ Sabana Blanco. Trafico di Sabana Blanco ta wordo desvia direccion Sta Cruz y despues pa e caminda di Cumana pa Meiveld y pasa patras di ex edificio di Codemsa y bolbe bek riba e caminda principal pa direccion Oranjestad.
E desviacionan na e rotonde lo keda indica cu baricadanan y borchinan di aviso.
Ta cera e caminda menciona entre 7’or di mainta pa 6’or di atardi.
Trabounan lo tin un duracion di 1 dia di trabou.
Nos ta pidi bo(so) persona comprencion y cooperacion pa e trabaonan cu mester tuma lugar y ta pidi disculpa pa cualkier inconveniencia cu por surgi.