Home Uncategorized Minister Sevinger a confirma “Gobierno a aproba 3 area pa proyectonan...

Minister Sevinger a confirma “Gobierno a aproba 3 area pa proyectonan di produccion di energia alternativa”

SHARE

ORANJESTAD – Durante un reciente conferencia di prensa, Prome Minister Mike Eman y su colega di Infrastructura Benny Sevinger, a informa cu a keda aproba areanan rond di Aruba  cu ta bay wordo uza pa proyectonan pa produccion di energia alternativo. Tur esaki den cuadro di e meta cu ta trahando riba dje pa e isla logra ta liber di fuel oil na 2020. Prome Minister Mike Eman a informa cu aworaki Aruba ta na un 40% di total di produccion di energia berde, via di e panelnan solar y molinanan di biento.

Tanto WEB como ELMAR ta trahando den forma activo pa cumpli cu e meta poni pa 2020, segun Eman a bisa. “Nos ta trahando duro pa logra cu na 2020 nos ta e prome pais cu ta totalmente sostenibel. Nos ta canando den bon direccion pa haya alternativanan cada bes  y den e meta aki ciudadanonan tambe por participa,” e mandatario a expresa.  E plan di Urirama ta den Corte. Di otro banda e parkenan solar a haya un empuhe basta grandi. Tin esun banda di aeropuerto cu ta percura pa 4 megawatt, ta desaroyando uno di 5 megawatt na Seroe Colorado.

Minister Benny Sevinger a confirma tambe cu recientemente tabatin un reunion importante, den cual a participa Utilities Aruba, Ministerio di Infrastructura  y Ministerio di Asuntonan General. A haci peticion pa reserva 3 area unda cu por desaroya proyectonan di energia berde. Minister Sevinger a confirma cu e 3 areanan a keda aproba door di su Ministerio. Prome Minister a splica cu un di nan ta riba e caminda cu ta conecta Barcadera cu Green Corridor. Na banda drechi a reserva algun area pa empresanan y tras di nan lo construi un Parke Solar cu por produci casi 10 Megawatt di coriente.  Den e meta sostenibel cu ta trahando riba dje, Prome Minister a bisa cu nan a haya un partner importante den Tesla. E empresa aki ta desaroya parkenan solar hunto cu bateria. Ademas di esey tin planea un Parke Solar den area di WEB mes, na e casnan di WEB, cual lo produci algun megawatt di coriente y finalmente tin esun na Smart Community. 

Mientras cu e proyectonan di biento ta sufriendo cierto tardanza door di casonan den Corte, “esaki ta duna nos confiansa cu nos por logra e vision di 2020, sigur si mira e desaroyo cu tin awo cu Tesla cu ta ofreciendo Parkenan Solar cu bateria, cual ta yega na trece stabilidad den e produccion di coriente. Esaki ta haci cu durante dia e baterianan ta wordo carga y anochi e coriente ta wordo usa. Pues e tecnologia ta wordo usa den forma continuo. E ta haci cu solo ta bira hopi atractivo. Si antes e tabata un produccion di 60% di solo y 40% di biento, awor cu e uzo di baterianan ta haya hopi mas di solo, y tambe energia renobabel di otro tecnologia, manera deep sea water cooling. Nos tin hopi confiansa cu nos ta logra nos meta.”

Sevinger a splica cu e motibonan cu no ta construyendo un cantidad di parkenan di energia renobabel, no tin di haber cu e capacidad pa construi nan, pero e ta basa riba e estudionan con pa mantene stabilidad di e grid na momento cu tin hopi energia renobabel, pasobra nan ta fluctua hopi. E tecnologia con pa maneha e  fluctuacionnan ta retonan. Pesey, el a bisa, tur bista ta riba Aruba, pa mira con ta maneha e retonan aki, con ta yena e buraconan den e fluctuacion, e tecnologia cu ta bay uza cu lo ta algo unico cu Aruba ta desaroyando pa yega na su meta. “Tin pais cu tin hopi energia renobabel y mayoria ta basa riba Hydro-energy, cu ta constant, pero cu tin problema ora cu riunan seca. Na Aruba tin hopi energia renobabel, pero cu variacion di tecnologia. Esey ta haci e situacion di Aruba algo unico.”