Henter team di Plataforma politico Pueblo Orguyoso y Respeta (POR) kier a invita tur Millennials, first time voters, hobennan profesional y tur hoben en general pa sintonisa e Debate Politico Constructivo “Millennial Edition” cu lo tuma luga dia 13 di juli na Cas di Cultura.
Durante di e debate aki lo atende cu temanan sumamente importante y di interes pa tur Millennial y cada un di e first time voters y hobennan profesional. “Como Millennial boso tambe tin e poder di voto y define e futuro di boso pais, haci uzo di dje”, ta e mensahe di Otmar Oduber di POR.
Durante e debate lo trata temanan manera tecnologia, economia y trabou pa nos hobennan y diferente otro tema importante pa cada un di nos hobennan. Ta hopi importante pa bo ta bon educa y bon informa asina bo por tuma un bon decision pa loke ta bo futuro dia 22 di september proximo. Actualmente POR tin diferente candidato cu ta representa e categoria di Millennial riba lista cu diferente punto di atencion manera cuido medico, situacion social, hobennan, ancianonan, animalnan, leynan entre otro.
Riba pagina di Facebook di POR bo por lesa e “Plan di Accion” pa mira locual cu POR ta presenta pa e proximo gobernacion. Si bo tin cualkier sugerencia y/of comentario por manda esaki riba [email protected] te cu diabierna y asina contribui na crea un plan di gobernacion unda bo voz tambe ta wordo scucha.
Lider di POR Otmar Oduber kier a extende palabranan di invitacion pa tur hobennan sintonisa e debate aki sea ta na Cas di Cultura of via transmision di TeleAruba: scucha, sigui y analisa e debate y vota segun bo consenshi 22 di september, hunto nos POR!