Home Uncategorized Diesdos hoben di Grupo 11 Formacion Social a haya nan baret

Diesdos hoben di Grupo 11 Formacion Social a haya nan baret

SHARE

Yen di orguyo nan a bisti esaki den presencia di Prome Minister Mike Eman

ORANJESTAD – Despues di a finalisa e fase di “deadpoint” di Grupo II di Formacion Social, e momento a yega pa nan ricibi nan baret, despues di a finalisa e fase militar cu exito. Esaki a tuma luga diaranson mainta den presencia di Prome Minister Mike Eman y e team encarga cu Formacion Social. Prome Minister Eman a expresa su orguyo grandi cu e hobennan aki a mustra perseverancia pa pasa e parti importante aki di Formacion Social, cu ta un programa iniciativa di e mandatario cu a inicia na 2012.

“Nos ta sumamente orguyoso pa ta testigo di e exito di un otro grupo di hoben cu a finalisa nan prome fase di e trayecto na Marina cu exito. E hobennan aki a mustra disciplina, determinacion, pasobra no ta facil e 4 lunanan na base di Marina, cu ta lunanan di trabou duro, disciplina y hopi dedica combina cu teamwork, bou guia di e Kader di Arumil,” Prome Minister Mike Eman a bisa na final di e ceremonia.

No mester lubida pakico mester ta orguyoso di e grupo cu a haya nan baret. E proceso cu e hobennan ta cana no ta facil. E grupo hopi biaha ta cuminsa cu mas di 20 hoben y na final no ta tur ta alcansa e fase di entrega di baret. Esaki ta nifica, e mandatario a bisa, cu e grupo aki a destaca den determinacion pa haci e diferencia y awe pueblo di Aruba por ta orguyoso di e hobennan. Awo nan ta cla pa sigui un fase nobo den nan bida, un di dos oportunidad cu nan a gara cu ambos man y den esaki a haya apoyo di nan mayor y tur esnan cu ta guia nan den e programa di Formacion Social. “Tur esaki ta pone nos sinti un orguyo grandi di nan y ta pone den nos man tambe como pais e responsabilidad pa ora cu nan toca na nos porta pa haya ayudo sea pa sigui scol, drenta Arumil of busca un trabou, nos como comunidad ta disponibel pa duna nan e siguiente oportunidad, mescos cu Formacion Social a duna nan un oportunidad. Bon trabou ainda falta, y tin basta tempo pa bay ainda,” e mandatario a bisa e hobennan.

Di e grupo 11 di Formacion Social e miho graduado a resulta Rechinell Wernet, kende a ricibi un plakaat for di man di Prome Minister Mike Eman.

Formacion Social ta un iniciativa di Prome Minister Eman for di momento cu el a inicia su Gobernacion na 2009 y a logra haya apoyo di Ministerio di Defensa di Hulanda. Aworaki e programa ta wordo carga completamente door di pais Aruba.