Home Uncategorized Otmar Oduber (POR): “Enseñansa especial na Aruba tin mester di atencion urgente”

Otmar Oduber (POR): “Enseñansa especial na Aruba tin mester di atencion urgente”

SHARE

Nos a yega final di un otro aña escolar, hopi lo ta reflexionando riba e resultadonan positivo, otronan riba con lo por hacie miho e siguiente aña, pero ta masha tiki lo ta pensando riba kico lo pasa cu e studiantenan cu a yega na e nivel mas leu cu por a yega den nan bida na Aruba. Aki Otmar Oduber ta referi na e muchanan, na e hobennan cu tin mester di un educacion special y cu lamentablemente na Aruba ta hopi limita.

E posibilidadnan pa e muchanan cu tin mester di educacion special na nos isla por wordo conta cu dedenan di un solo man y si ta trata di muchanan cu tin un deshabilidad halto, ta uno so, sin cu esaki ta necesariamente un scol secundario, sino mas bien un pasadia.

Mayornan di e muchanan aki ta keda cu mannan mara pues no tin manera pa nan yiunan por sigui un enseñansa digno y ta keda na merced di e capacidad cu e pasadia por tin. Hopi biaha por wak cu e mayornan aki ta tuma e decision drastico di bandona Aruba y bay biba den exterior pa asina por brinda nan yiu un miho porvenir, un futuro cu na Aruba nan no lo por haya. Pero no ta tur mayor tin e posibilidad di bay biba den exterior y nan ta keda Aruba cu un desaroyo demasiado limita pa nan yiu.

Instancianan concerni a bati no uno, sino varios biaha na gobierno pasobra e medionan financiero cu nan tin no ta suficiente pa por atende e clientenan cu nan tin na e momentonan aki. Nan ta haci nan maximo esfuerzo pa por duna e miho cuido y atencion posibel, pero si nan no haya mas fondo for di gobierno, nan lo mester baha e cantidad di cliente cu nan ta ricibi, aumentando asina e problema existente.

“Esaki ta e tipo di situacionnan cu nos di POR ta mira cu mester prioridad. Desaroyo di nos muchanan, especial of no, ta un deber y nos tine como prioridad. No por ta asina cu ta inverti miyones den infrastructura, pero ta laga e cuido, enseñansa y porvenir real di nos hendenan y den e caso aki di nos muchanan un banda. Kico nos por logra cu un caretera nobo si nos yiunan no ta hayando e atencion y cuido necesario, si nan futuro ta wordo limita pa falta di opcionnan, pa falta di medionan financiero, pasobra gobierno no por of no kier duna mas”, Otmar Oduber ta indica.

E ta agrega cu POR ta kere firmemente cu educacion y enseñansa ta e motor di cualkier sociedad prospero y ta conduci na desaroyo social y crecemento economico. Tanto e alumno como maestro merece di forma parti di un sistema educativo unda excelencia, calidad  y desaroyo continuo ta e base di tur decision. POR ta duna maximo importancia na enseñansa liber y igual.

Como partido POR ta conciente cu nos ta un sociedad hopi chikito y hopi biaha no por inverti den tur problema individual cu hobennan por tin, pero e opcionnan cu tin na e momentonan aki ta hopi limita y mester inverti mas den e sector aki.

Den e siguiente dianan e team di POR lo ta enfocando mas riba e tema aki, presentando e ideanan cu ta refleha e vision di E Forsa Nobo pa loke ta enseñansa especial na Aruba y e ayudo cu e diferente instancianan mester pa por brinda un servicio excelente pa tur nan clientenan.