Cu aprobacion unanime den parlamento.
ORANJESTAD – Siman pasa parlamento a aproba e cambio den ley di ‘inkomstenbelasting’ unda cu a inclui dos facilidad entrante 2016. Minister di Finanza, Angel Bermudez, a splica cu awor den aangifte por deduci tanto e interes como tambe e pago cu ta haci riba un fiansa di estudio.
Te cu aña 2015 tabata existi unicamente e posibilidad pa deduci e interes, pero awor por integralmente deduci e pago mes for di bo entrada. E ley aki cu a keda aproba siman pasa den Parlamento, segun splicacion di Minister Bermudez, tambe ta inclui un rebaho di 35% na esunnan cu tin un fiansa di pais Aruba pa nan estudio.
Sin embargo e mandatario splica cu e cambio aki ta conta cu dos banda. E descuento di 35% riba pago di fiansa di estudio aki ta conta pa esunnan cu ta page den un solo biaha. Minister Bermudez ta indica cu den caso di un studiante cu no ta bin bek Aruba of ta keda biba den exterior, e ta facilita nan pa nan no keda 15 pa 20 aña cu un encargo di pago na Aruba pa paga e lening bek. E grupo di studiante aki tambe ta haya un facilidad pa paga nan fiansa den un solo biaha cu e descuento di 35%.
Di otro banda esunnan cu bin bek y cu registra na Aruba despues di nan estudio tambe por bin na remarke di e 35% di descuento cu antes tabata e parti di ‘beurs’ cu nan tabata haya. “Esaki ta reduci e debe total cu nan tin y nan ta haya un areglo di pago cu segun e ley aworaki, ta di 15 aña cu un interes di 2%”, e mandatario a sigui informa.
Minister Bermudez aindica cu Departamento di Direccion di Finanzas den e proceso aki a inventarisa henter e cartera di fiansanan cu gobierno a otorga den e ultimo 30 aña, cu ta un suma di mas cu 400 miyon florin. “Actualmente nos sa precisamente ken debe cuanto y pa esaki nos a institui tambe un afdeling special na Direcion di Finanzas pa esaki”, e mandatario a expresa.
Den e siguiente lunanan, e departamento aki cu awor ta conta cu un programa digital pa administra y procesa henter e cartera aki lo factura tur ‘statements’ lo informa tur studiante y ex-studiante cu a ricibi fiansa di estudio, kico exactamente nan debe, kico ta e condicionnan, e terminonan cu nan por tene nan mes na dje pa e debe aki y kico ta nan obligacionnan pa e fiansanan cu nan a haya.