Home » Tur 15 Comisario kita for di companianan mester wordo tuma bek mesora y cu tur pago

Tur 15 Comisario kita for di companianan mester wordo tuma bek mesora y cu tur pago

by Admin
0 comments 1.4K views

 

ORANJESTAD – Hues a dicta sentencia den e caso sumario cu e 15 Comisarionan cu a wordo retira di e companianan cu ta cay bou di Utilities N.V.

ARUBA NATIVE por a compronde cu Hues a cuestiona e retiro di 15 Comisario for di companianan di cual Aruba Utilities N.V. (UA) ta e accionista y a ordena pa tur e companianan tuma tur e 15 Comisarionan bek na trabao.

Esaki ta e sentencia cu Hues di Corte di Husticia a duna Diabierna, den e caso sumario cu 15 Comisario a cuminsa contra e companianan: WEB N.V., Elmar, Aruba Wastewater Sustainable Solutions (AWSS), Aruba Renewable Energy N.V. (ARE) y Aruba Utilities N.V. (UA).

Ta asina cu na Juli 2025, tur e 15 Comisarionan a haya carta di nan compania, informando cu den un reunion general a dicidi, cu no tin confianza mas den nan y cu nan no ta miembro mas di Comisario. Despues nan tur a wordo retira.

E 15 Comisarionan a cuminsa un caso sumario contra tur e companianan y Aruba Utilities N.V.

COMISARIONAN DECLARA NO ADMISIBEL

Hues den su evaluacion di e caso, ta mustra cu e 15 Comisarionan a exigi pa Hues ordena Aruba Utilities N.V., pa hala nan retironan aden, te ora cu den un caso mas profundo, Corte dicidi riba e legalidad di e retironan.

Aruba Utilities N.V. a reacciona cu e no por wordo mira como parti di e companianan ya cu e ta accionista di e companianan y no un compania caminda e Comisarionan ta den funcion.

Hues ta haya cu Utilities N.V.no tin razon y a declara tur e 15 Comisarionan no admisibel den nan demanda.

CUESTIONA RETIRONAN

Hues ta haya cu no tin suficiente motivacion di parti di e companianan, cu ta hustifica e retiro di e 15 Comisarionan.

Na opinion di Hues, e solo hecho cu a bin un cambio di Gobierno, no ta suficiente. Hues ta comparti opinion di e 15 Comisarionan, cu nan retiro ta puramente pa motibo politico, esta cambio di Gobierno.

NO ADMISIBEL

Hues su decision di e caso sumario ta, cu e ta declara tur e 15 Comisarionan no admisibel den nan demanda contra Utilities N.V.

MESTER TUMA TUR COMISARIO BEK

Hues ta suspende e decisionnan di retiro di e companianan di Utilities N.V. tuma 11 Juli 2025. Esaki te ora cu den un caso mas profundo, Corte tuma un decision riba e legalidad di e retironan.

MESTER PAGA TUR SALARIONAN

Hues a ordena tur e companianan di Utilities N.V., pa paga tur e 15 Comisarionan nan salario te ora cu tin un decision den e caso mas profundo. Esey ta encera, salario y e beneficionan manera ta para den e contractnan.

DAÑO PER JUICIO

Hues a stipula cu cada compania lo mester paga un daño per juicio di 2500 florin pa cada dia cu keda sin cumpli cu e sentencia, te un maximo di 250 mil florin.

MESTER LAGA TUR COMISARIO DRENTA COMPANIA

Hues a ordena tambe cu cada compania mester laga cada Comisario por drenta tur localidad, oficina, sin cu e ta wordo stroba. Mester percura pa cada Comisario haya tur documento di reunionnan relevanta, informacionnan di e directiva, facilidadnan di comunicacion pa asina nan por haci nan trabao di observacion.

Mester percura cu cada Comisario lo por haci su trabao manera e tabata haci.

You may also like