Aruba brilla riba escenario deportivo internacional cu tres dia di competencia, talento y perseverancia.
ORANJESTAD, 28 di october 2026 – Aruba a bolbe demostra su potencial como anfitrion di eventonan deportivo internacional cu e celebracion exitoso di iF3 Masters World Championships Aruba 2026, un campeonato mundial di Functional Fitness cu a reuni mas di 300 atletanan internacional for di mas di 25 pais pa tres dia di competencia intenso, determinacion y excelencia deportivo.
Minister di Deporte, sra. mr. Gerlien Croes, a participa entre otro den e ceremonia oficial di premiacion, caminda a honra e atletanan cu a sobresali durante e campeonato y a reconoce e dedicacion y perseverancia di tur participante.
E campeonato a brinda Aruba un oportunidad valioso pa presenta su hospitalidad, infrastructura deportivo y capacidad pa ta anfitriondi un competencia di nivel mundial, mientras cu atletanan di diferente pais a comparti nan pasion pa deporte den un ambiente di respet, forsa, resistencia y competencia sano.
Reconocemento pa excelencia, dedicacion y perseverancia
Durante e ceremonia di premiacion, Minister Gerlien Croes a felicita tur e ganadornan di medaya, reconociendo cu cada logro ta e resultado di añanan di preparacion, disciplina y sacrificio.
E minister a destaca cu e campeonato no solamente ta celebra e atletanan cu a logra subi podio, sino tambe cada participante cu a demonstra determinacion y compromiso pa sigui desaroya su talento deportivo.
“Cada medaya ta conta un historia di sacrificio, disciplina y perseverancia. Tras di cada atleta tin incontabel ora di entrenamento, preparacion y un deseo continuo pa supera su propio limitacionnan. Como Minister di Deporte, ta un honor pa mi por celebra e logronan aki y reconoce tur atleta cu a forma parti di e campeonato mundial na Aruba,” Minister Gerlien Croes a expresa.
Segun Minister Gerlien Croes, e participacion di atletanan Masters ta un inspiracion importante, demostrando cu pasion pa deporte, perseverancia y un estilo di bida activo no tin limite di edad.
“E atletanan aki ta demostra cu excelencia deportivo no ta defini door di edad, sino door di compromiso, mentalidad y e boluntad pa sigui supera bo mes. Nan ta un ehempel inspirativo pa nos comunidad y particularmente pa nos generacionnan venidero,” e minister a agrega.
Aruba como escenario pa deporte internacional
E organisacion di iF3 Masters World Championships Aruba 2026 ta representa otro oportunidad pa fortalece e posicion di Aruba den mundo deportivo internacional.
Durante tres dia, e campeonato a reuni atletanan, entrenadornan, delegacionnan y acompañantenan, creando un ambiente di intercambio cultural y deportivo cu ta contribui na visibilidad internacional di nos isla.
Minister Gerlien Croes a destaca cu eventonan di e magnitud aki tin un balor cu ta bay mas leu cu e competencia mes. Nan ta brinda oportunidad pa promove deporte, inspira participacion local y fortalece e relacionnan entre Aruba y organisacionnan deportivo internacional.
“Ora Aruba ta ricibi un campeonato mundial, nos no ta solamente habri nos portanan pa competencia deportivo. Nos ta presenta nos isla, nos hospitalidad y nos capacidad pa reuni talento internacional. Cada evento exitoso ta contribui na e posicionamento di Aruba como un destino cu ta brinda oportunidad pa deporte, intercambio cultural y desaroyo economico,” Minister Gerlien Croes a indica.
E minister a enfatisa cu e presencia di atletanan internacional ta tambe un oportunidad pa inspira mas hende na Aruba pa incorpora actividad fisico y deporte como parti di nan estilo di bida.
Sport Tourism: deporte como motor pa oportunidad economico
E campeonato mundial aki ta un ehempel bibo di e potencial di Sport Tourism na Aruba. Cu mas di 300 atleta internacional for di mas di 25 pais, sin conta nan entrenadornan, famianan y acompañantenan, e evento ta ilustra con deporte por contribui na atrae bishitantenan y genera actividad economico pa nos isla. E impacto ta bay mas leu cu e competencia mes, creando oportunidad pa nos sector hotelero, gastronomia, transporte y diferente negoshinan local. Segun Minister Gerlien Croes, “Sport Tourism ta un oportunidad strategico pa Aruba sigui diversifica su oferta turistico, fortalece su posicion como anfitrion di eventonan internacional y conecta desaroyo deportivo cu crecemento economico. Cada campeonato cu nos ta ricibi ta un oportunidad pa presenta Aruba na mundo, mientras nos ta crea mas balor pa nos comunidad y economia local.”
Aprecio pa liderazgo y cooperacion internacional
Minister Gerlien Croes a dedica un reconocemento special na Presidente di International Functional Fitness Federation (iF3) y Presidente di Functional Fitness Federation Aruba, pa nan liderazgo, dedicacion y compromiso den realisacion di e campeonato mundial.
Segun e minister, e cooperacion entre federacionnan internacional y local ta esencial pa crea oportunidadnan deportivo di nivel halto y fortalece e desaroyo di diferente disciplina na Aruba.
“Mi kier expresa un gradicimento special na e presidentenan di International Functional Fitness Federation y Functional Fitness Federation Aruba. Nan liderazgo, vision y compromiso a contribui na realisacion di un campeonato cu ta pone Aruba den e luz internacional. E tipo di cooperacion aki ta esencial pa sigui habri porta pa mas oportunidadnan deportivo na nos isla,” Minister Gerlien Croes a expresa.
E minister a extende su aprecio tambe na e organisadornan, voluntarionan, huesnan, partnernan y tur esnan cu a contribui na e preparacion y ehecucion di e campeonato.
Un celebracion di deporte cu ta inspira
Pa Minister Gerlien Croes, e exito di iF3 Masters World Championships Aruba 2026 ta un refleho di e poder cu deporte tin pa uni hende di diferente pais, cultura y generacion rond di balornan comparti manera disciplina, respet y perseverancia.
E minister a felicita tur medayista y participante pa nan prestacionnan y a expresa su deseo pa cu e experencia aki na Aruba keda como un recuerdo special pa tur e delegacionnan internacional.
“Nos ta sumamente orguyoso di por a forma parti di e celebracion mundial aki. Aruba a brinda e escenario, pero ta e atletanan, organisadornan y tur esnan envolvi cu a haci e campeonato un experencia memorabel.
Mi felicitacion ta bay na tur medayista y participante. Boso determinacion y pasion ta e berdadero esencia di deporte. Nos ta celebra boso logronan y nos ta celebra Aruba, cu un biaha mas a briya riba escenario deportivo internacional.
Nos compromiso ta pa sigui sostene e desaroyo di deporte, fortalece nos relacionnan internacional y crea mas oportunidad pa Aruba sigui sobresali como un isla di talento, hospitalidad y excelencia deportivo,” Minister Gerlien Croes a conclui.