Home » Grupo di Boluntario ELMAR “Briya Hunto” a participa na Dia Nacional di Cuida Aruba na Brazil 

Grupo di Boluntario ELMAR “Briya Hunto” a participa na Dia Nacional di Cuida Aruba na Brazil 

by Admin
0 comments 179 views

 

 

Oranjestad, Aruba – 29 di juli 2026 – N.V. ELMAR a participa na Dia Nacional di “Cuida Aruba”, un iniciativa di Gobierno di Aruba y CEDE Aruba pa reuni organisacionnan y boluntarionan den un esfuerso colectivo pa mantene Aruba limpi.

 

E participacion aki a marca tambe e relansamento di ELMAR su grupo di boluntario, awor cu e nomber “Briya Hunto”. Cu e grupo aki, ELMAR kier promove participacion colectivo den iniciativanan cu ta contribui na bienestar di nos comunidad.

 

Pa e actividad, ELMAR a participa cu 20 boluntario, kende a contribui na limpiesa di e ruta di Parada Folklorico Cultural den bario di Brazil. E grupo a reuni na Centro di Bario Brazil, caminda representantenan di Centro di Bario Brazil, Bureau City Inspector y CEDE Aruba a coordina e asignacion di e ruta y facilita e materialnan necesario pa e accion di limpiesa.

 

Durante e actividad, e boluntarionan a traha hunto pa recoge sushi na Caya Bernadina Growell y den e areanan di Brazil y Mabon, cu ta forma parti di e ruta di Parada Folklorico Cultural. Cu e esfuerso aki, nan a contribui na un ambiente mas limpi y agradabel pa e comunidad y pa e celebracionnan binidero.

 

E accion di limpiesa a contribui na preparacion di bario di Brazil pa Dia di Brazil y Parada Folklorico Cultural, actividadnan organisa den colaboracion cu Fundacion Chico Harms, di cual ELMAR ta patrocinado oficial.

 

Cu e relansamento di “Briya Hunto” y su participacion na “Cuida Aruba”, ELMAR ta sigui fortalece su compromiso social, promove trabou den ekipo y participacion colectivo den iniciativanan cu ta beneficia nos comunidad. 

Hunto Nos ta Briya Mas!

 

You may also like