Home » Fraccion di MEP:  UN PERMISO NA TEMPO, SIGURIDAD PA CADA EMPRESARIO: PREGUNTANAN PA MINISTER TOCANTE E ATRASO NA DEZHI

Fraccion di MEP:  UN PERMISO NA TEMPO, SIGURIDAD PA CADA EMPRESARIO: PREGUNTANAN PA MINISTER TOCANTE E ATRASO NA DEZHI

by Admin
0 comments 82 views

 

 

 

ORANJESTAD – Un empresario cu ta warda riba un permiso comercial, ta warda riba e oportunidad pa construi, pa emplea hende y pa inverti. Pesey fraccion di MEP a haci preguntanan por escrito na Minister di Asuntonan Economico tocante e atraso den e tratamento di permisonan comercial.

 

Riba 23 october 2026, Directie Economische Zaken, Handel en Industrie (DEZHI) a presenta un nota na Parlamento. Den dj’e, e departamento ta reconoce cu desde cuminsamento di 2026 tin un atraso den e tratamento di peticionnan. E atraso aki ta debi, entre otro, na capacidad limita di personal, e mudamento di e departamento, e cambio pa “cloud” y e scrapmento di mas o menos 1.100 permiso di empresanan inactivo. Mas di 1.500 scrapmento mas ta planea pa cuminsamento di 2027.

 

Sinembargo, e nota no ta menciona cuanto peticion tin pendiente, cuanto tempo e tratamento ta dura, ni te ki fecha e atraso lo ta elimina. Pa empresarionan y pa Parlamento, esaki no ta suficiente.

 

E preguntanan ta enfoca riba:

 

  • Claridad: cuanto peticion tin pendiente, cuanto tempo e tratamento ta dura y ki dia e atraso lo ta elimina?
  • Capacidad structural: con gobierno lo evita cu e scrapmentonan cu falta ta atrasa e tratamento regular di nobo?
  • Siguridad legal: ki proteccion tin pa empresarionan cu nan permiso a wordo kita pa error?
  • Digitalisacion y proteccion di datos: ki ta e timeline y presupuesto, y con e datonan lo wordo protege den “cloud”?

E limpiesa di e archivo di permisonan y e atencion pa combati labamento di placa y financiamento di terrorismo merece apoyo. Pero politica di integridad no mester bay a costo di e servicio pa empresarionan cu ta respeta e reglanan.

 

Fraccion di MEP a pidi Minister pa contesta e preguntanan pa escrito den 3 siman.

You may also like