Home » Contracto cu dentista Cecile Provence ta termina.

Contracto cu dentista Cecile Provence ta termina.

Entrante 1 di december 2026 tin un traspaso automatico di aseguradonan inscribi cerca dentista Cecile Provence.

by Admin
0 comments 1 views

 

 

Pa medio di e comunicado di prensa aki, Organo Ehecutivo AZV (OE AZV) ta informa tur  asegurado inscribi cerca dentista Cecile Provence pa tuma nota cu e contracto entre OE AZV y  dentista Cecile Provence ta finalisa 30 di november 2026. Den caso cu tin un cita despues di 30 di  november 2026, lo e asegurado mester tene cuenta cu e cita aki no ta wordo cubri mas door di  OE AZV. Ta gradici dentista Cecile Provence pa su añanan di servicio cu el a brinda na e  aseguradonan di AZV. Na mes momento ta desea dentista Cecile Provence hopi exito cu e  continuacion di su practica priva.  

Oportunidad pa haci cambio 

Desde awor te cu 30 di november 2026, cada cliente di dentista Cecile Provence tin e  oportunidad pa haci cambio pa un dentista nobo. Con ta haci esaki? E asegurado ta bay riba nos  website www.azv.aw → scoge “Formulario” → djey “Peticion pa cambio”. Yena tur dato y primi e  boton “manda”. Of regla esaki via e AZV-app (scoge pa Menu → E dunadonan di cuido di …→  Cambia di dunado di cuido → Scoge tipo di dunado di cuido → Scoge Dentista Nobo for di e lista  “dropdown” → Primi e boton “manda”).  

Traspaso automatico 

Entrante 1 di december 2026 OE AZV ta percura pa un traspaso automatico pa diferente dentista  ubica den Playa y vecindario. Esaki ta sosode automaticamente (digitalmente) y e asegurado mes  no tin nodi haci nada. Pa haya sa cerca cua dentista ta registra awor; e asegurado ta wak den su  AZV app. E ta bay riba Menu →Dunadonan di cuido →E dunadonan di cuido di……→Dentista.  Bou di e bloke (of seccion) ey lo wak e nomber di e dentista nobo. 

No ta di acuerdo 

Den caso cu e asegurado no ta di acuerdo cu e traspaso automatico aki, tin tur oportunidad pa  inscribi cerca un otro dentista cu ta disponibel. Pa haci cambio e asegurado ta bay riba nos  website www.azv.aw → Formulario → Peticion pa cambio. Of regla esaki bo mes via e AZV-app  (scoge pa Menu → E dunadonan di cuido di …→ Cambia di dunado di cuido → Scoge tipo di  dunado di cuido → Scoge Dentista Nobo for di e lista “dropdown” → Primi e boton “manda”).  Den caso cu bo persona a haci e cambio caba, esta a cambia caba pa un dentista di bo propio  escogencia/preferencia, e ora no mester haci nada. E informacion di bo dentista nobo ta visibel  den bo AZV-app. 

Mas pregunta? 

Den caso cu despues di lesa e comunicado di prensa aki ainda tin pregunta, e ora por tuma  contacto cu e departamento di Administracion di Polisa y Servicio na Cliente via telefon 5279900  of email: [email protected]

You may also like