Home » Aruba ta inicia proximo fase di consulta publico pa su areanan marino di lama grandi

Aruba ta inicia proximo fase di consulta publico pa su areanan marino di lama grandi

by Admin
0 comments 102 views

 

ORANJESTAD, ARUBA – Como parti di e compromiso continuo di Aruba pa proteha su medio ambiente marino bou di e meta global di 30×30, Gobierno di Aruba, pa medio di Directie Natuur en Milieu (DNM), den colaboracion cu Aruba Conservation Foundation (ACF) y Blue Marine Foundation (BMF), ta invita comunidad y usuarionan di lama pa participa den e proximo fase di consulta publico.

Tres sesion di informacion y consulta publico lo tuma luga dia 28 y 29 di october y 11 di november 2026, durante cual lo presenta cuater scenario proponi pa proteccion di areanan marino di lama grandi (offshore) di Aruba.

E compromiso di Aruba cu 30×30

E meta global di 30×30 ta busca pa conserva y maneha efectivamente por lo menos 30% di e areanan terestre y marino di mundo pa aña 2030. Aruba a incorpora e meta aki den su Strategia Nacional y Plan di Accion di Biodiversidad (NBSAP) 2024–2030, cu ta indica e prioridadnan di nos isla pa proteha y restaura biodiversidad.

E oceano ta uno di e recursonan natural mas valioso di Aruba. E ta provee cuminda, sostene pesca y e medio di subsistencia di hende, y ta contribui na nos economia, cultura y forma di bida. Proteha nos ecosistemanan marino ta esencial pa mantene e beneficionan aki pa generacionnan actual y di futuro.

Continuando riba consultanan anterior

For di februari te cu april 2026, DNM, ACF y BMF a tene un prome ronda di consulta cu representantenan di gobierno, organisacionnan no-gubernamental, gruponan di comunidad y sectornan cu ta haci uzo di lama. E opinionnan ricibi, hunto cu datonan cientifico disponibel y evaluacionnan tecnico, a contribui na desaroyo di cuater scenario proponi pa proteccion di lama grandi.

E fase actual ta enfoca exclusivamente riba areanan marino di lama grandi (offshore). Lo trata e proteccion di areanan cerca di costa (nearshore) separadamente pa medio di un proceso mas largo.

Ta importante pa enfatisa cu e cuater scenarionan proponi no ta decisionnan final. Aruba ainda ta evaluando posibel areanan pa proteccion marino y e proceso no a yega na e etapa di desaroya un plan di maneho. Decisionnan tocante eventual designacion y maneho di e areanan aki lo wordo considera den etapanan posterior.

Ta p’esey participacion di comunidad ta importante awor. E experiencianan, perspectivanan y conocemento local di personanan cu ta uza y depende di lama ta contribucionnan valioso na e proceso.

Sesionnan di informacion publico

Gobierno di Aruba, pa medio di DNM, den colaboracion cu ACF y BMF, ta invita comunidad y tur usuario di lama pa participa den e siguiente sesionnan:

  • Diaranson, 28 di october: Teresita Center, San Nicolas
  • Diahuebs, 29 di october: MFA Noord
  • Diaranson, 11 di november: MFA Paradera

Orario: 6:45 PM – 8:45 PM

Durante e sesionnan aki, participantenan lo haya informacion tocante e cuater scenarionan proponi, por haci pregunta, pidi aclaracion y comparti punto di bista por medio di yena un encuesta di consulta.

Como parti di e proceso di consulta publico, lo tin tambe un encuesta online disponibel te cu 27 di november 2026, pa comunidad por contribui cu su opinion. Mas informacion tocante e encuesta y con pa participa online lo wordo comparti proximamente.

Pa mas informacion y actualisacionnan, sigui Aruba 30×30 riba Facebook y Instagram.

 

-fin-

 

You may also like