Home » AAA y A.T.A. ta celebra 20 aña di vuelo directo di JetBlue entre New York y Aruba

AAA y A.T.A. ta celebra 20 aña di vuelo directo di JetBlue entre New York y Aruba

by Admin
0 comments 198 views

 

 

ORANJESTAD – Aruba Airport Authority N.V. (AAA), hunto cu JetBlue y Aruba Tourism Authority (A.T.A.), ta celebra e di 20 aniversario di e servicio di vuelo directo di JetBlue entre New York y Aruba. E ocasion ta reconoce e contribucion di e aerolinea na e conectividad aereo di Aruba y na e industria turistico di nos isla.

 

JetBlue a inicia su servicio pa Aruba dia 15 di september 2006, cu un vuelo directo for di John F. Kennedy International Airport (JFK) na New York pa Aeropuerto Internacional Reina Beatrix (AUA). Loke a cuminsa cu e ruta inaugural aki a crece y bira un conexion aereo importante, fortaleciendo e lasonan entre Aruba y un di su mercadonan principal, mientras ta ofrece biaheronan mas opcion pa planifica nan biahe pa y for di nos isla.

 

Actualmente, JetBlue ta conecta Aruba cu New York (JFK), Boston (BOS) y Fort Lauderdale (FLL), manteniendo su papel como un socio aereo importante pa e destinacion. E servicio di e aerolinea a contribui na e economia turistico di Aruba, ofreciendo opcionnan practico di biahe pa bishitantenan y residentenan, ademas di conexion cu otro destinacionnan den e red di JetBlue cu ta sigui crece.

 

“Durante 20 aña, JetBlue ta un socio aprecia den e conexion di Aruba cu Merca y den e ricibimento di biaheronan na nos aeropuerto. E aniversario aki ta refleha e fortalesa di nos relacion di hopi aña y e dedicacion di e ekiponan di JetBlue cu a sostene e operacion durante tur e añanan aki. Nos ta gradici JetBlue pa su compromiso continuo cu Aruba y nos ta mira cu entusiasmo na e oportunidad pa sigui fortalece e relacion aki den e añanan cu ta bini”, asina Jonny Andersen, CEO di AAA, a expresa.

 

Minister di Turismo, Transporte y Labor, Wendrick Cicilia, a destaca cu e colaboracion ta beneficia tanto e sector turistico como e comunidad. “Mientras nos ta celebra 20 aña di servicio di JetBlue pa Aruba, nos ta reconoce e balor di un relacion cu ta sostene tanto nos sector turistico como nos comunidad. Cada conexion ta crea oportunidad pa bishitantenan descubri nos isla, pa empresanan local crece y pa residentenan biaha. Nos ta gradici JetBlue pa su confiansa continuo den Aruba y nos ta mira pa un futuro den cual un conectividad fuerte ta contribui na turismo di calidad y na e bienestar di nos pueblo”, Cicilia a declara.

 

Dave Jehn, vice-presidente di planificacion di red y aliansa cu aerolineanan na JetBlue, a subraya e importancia di Aruba pa e compania. “Aruba ta forma parti importante di e red di JetBlue durante 20 aña y nos ta orguyoso di e conexionnan cu nos a crea cu e isla y su hendenan. Nos ta gradici pa e colaboracion di hopi aña cu Aruba Airport Authority y Aruba Tourism Authority y nos ta desea di sigui conecta nos clientenan cu Aruba, cu e servicio y experiencia cu nan conoce y aprecia di JetBlue”, Jehn a expresa.

 

Reconocemento pa e hendenan tras di e conexion

CEO di A.T.A., Ronella Croes, a destaca e contribucion di JetBlue na e contacto entre Aruba y su mercadonan importante na Merca. “JetBlue a hunga un papel importante den conecta nos isla cu mercadonan principal na Merca y den ofrece biaheronan e oportunidad pa experimenta y aprecia Aruba. Cu su servicio continuo durante e ultimo dos decada, e aerolinea a yuda generacionnan di bishitante conoce mas di nos cultura y nos pueblo. Nos ta gradici JetBlue pa su apoyo y compromiso continuo cu Aruba y nos ta contento di sigui traha hunto”, Croes a declara.

 

Pa marca e aniversario, AAA a organisa un celebracion cu e ekipo local di JetBlue na Aeropuerto Internacional Reina Beatrix, dia 15 di october den oranan di mainta, den e hala di check-in. E ekipo a ricibi un reconocemento pa su dedicacion y contribucion na e operacion di JetBlue na Aruba, cu un bolo, pasapalo y cuki conmemorativo. Pasaheronan cu a sali for di Aruba cu vuelonan di JetBlue e dia ey tambe a ricibi un articulo conmemorativo cu e marca di e aerolinea, como un gesto di aprecio pa nan lealtad.

 

Na New York, miembronan di e ekipo di A.T.A. a uni cu JetBlue na JFK pa celebra e aniversario hunto cu e ekipo di e aerolinea y pasaheronan cu tabata biaha pa Aruba. Como parti di e celebracion, e ekipo di A.T.A. a interactua cu pasaheronan den e terminal y a invita nan pa haci e Aruba Promise prome cu nan subi bordo. Cu e promesa aki, biaheronan a compromete nan mes pa disfruta di Aruba cu responsabilidad y contribui na preservacion di su bunitesa natural, cultura y hospitalidad pa e generacionnan cu ta bini.

 

E celebracionnan na Aruba y New York a reconoce tanto e aniversario di e ruta como e tripulantenan, socionan y pasaheronan cu a yuda mantene e conexion durante dos decada. E aniversario ta subraya e compromiso comparti di AAA, JetBlue y A.T.A. cu un conectividad confiabel, un experiencia agradabel pa pasaheronan y e exito continuo di Aruba como un destinacion prominente den Caribe. Despues di 20 aña di servicio di JetBlue pa Aruba, AAA y A.T.A. ta desea sigui cu e colaboracion y crea experiencianan positivo pa pasaheronan cu ta yega y sali via Aeropuerto Internacional Reina Beatrix.

 

Tocante Aeropuerto di Aruba 

AUA Airport ta un di e aeropuertonan mas ocupa den region Caribe, cu mas di 24 diferente aerolinea operando na Aruba contribuyendo na mas cu 3.4 miyon pasahero pa aña y brindando servicio aereo na 30 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 71% ta di Merca y Canada, 20% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba. 

 

Haya sa mas di loke ta sosode na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport. 

 

You may also like