E oficina di turismo na San Nicolas of e asina yama Visitor Information Center (VIC) a sera prome di juli debi na vencemento di e contract cu sr Berenos. No tabata e intencion pa esaki a sera na ningun momento, pero e proceso a dura mas cu a wordo anticipa. Manera ta conoci e infrastructura di e edificio di VIC a keda ful renoba recientemente haciendo esaki mucho mas moderno. Minister Oduber a duna di conoce cu e VIC lo ta operacional bek dia 19 di augustes, esaki sigur ta un bon noticia pa Sunrise City.
E VIC lo bay consisti di 2 trahador di cual 1 trahado ta traha paden y 1 trahador lo traha como tourguide. E dos trahadornan aki a cumpli cu tur e exigencianan di ATA. E VIC lo opera di dialuna pa diabierna dentro e orario di 9am pa 5pm. Na e VIC e turista lo ricibi tur informacion di kiko tur San Nicolas tin di ofrece. E tourguide lo comparti su conocemento cu e turistanan na un manera profesional, un di e tournan lo ta e tour di e murayanan di arte den mainstreet.
San Nicolas ta rico den historia, cultura y arkitectura, e turistanan por haya un refleho di e bida diario di e habitantenan di San Nicolas. San Nicolas ta un cuidad bieu y alaves nobo, fuerte y tradicional pero semper evolucionando. Minister Dangui Oduber ta kere den e potencial di San Nicolas y lo zorg pa San Nicolas haya su fair shar. E oficina sigur ta complementa e otro bunita proyecto di Baby Beach cu dentro di poco lo tin groundbreaking. San Nicolas ta hayando e atencion cu e merece.