Palm Beach: Diasabra algo prome cu 8’r di mainta, presencia di brandweer a wordo pidi cu hopi urgencia na South Beach, pa motibo cu huma tabata saliendo for di e bar. Un unidad di brandweer a sali mesora for di e Kazerne di Brandweer na Tanki Flip, direccion Palm Beach.
Na yegada enberdad nan a bin ripara cu ta trata di e bar di South Beach cu tabata sacando huma. Mesora brandweer a cuminsa traha y hopi lihe a logra habri e bar y pa asina cuminsa na combati e candela, evitando cu e candela lo por bira mas grandi y haci hopi mas daño.
Despues di basta rato tratando na combati e candela, brandwee a logra domina y paga e candela. E candela a causa hopi daño na e bar y sigur lo tuma algun dia pa por drecha esaki pa e por ta den funcion bek.
Polis y hefe di brandweer a presenta na e sitio. Muy probablemente e motibo di e candela ta bin door di un kortsluiting na e wayanan di coriente den e bar, cu ta conecta cu e cash register. E manager di South Beach tambe tabata presente y no por a kere kiko a pasa cu su bar. Danki na brandweer cu a sa di actua hopi lihe, a evita cu e bar no a kima por completo.