Garfield Heights (Ohio) Merca: Recientemente un dama di 79 aña residente di Garfield Heights, a wordo sentencia cu 10 dia di castigo di prison, paso contra tur palabracion a sigui cria pushinan cu no tin doño y ta biba riba caya, tur dia na su cas cu cuminda. E sentencia a laga e dama aki cu ta stima bestia, hopi babuca, Nancy Segula lo mester meld na e prison di Cuyahoga County Jail di Ohio, pa asina sinta su castigo.
Segula ta haya e castigo absurdo y bon idioot, pero a bisa elo bay tras di tralie pa un bon causa.
Segula a ricibi su castigo como ultimo acuerdo despues di 4 advertencia oficial cu a wordo poni riba papel for di 2017, cual ta e aña cu su bisiña a verhuis y a laga su pushinan atras. Segula a cuminsa carga cabes paso e pushininan no ta hayando cuminda y a dicidi di cuminsa crianan su mes. E habitante nobo di e cas no tabata kier tin nada di haci cu e pushinan.
E bisiñanan nobo tabata keda yama polis cada biaha e mira cu Segula ta dunanan e pober bestianan cuminda. Paso caminda cu nan ta biba ta prohibi pa cria bestia cu no tin un doño oficial. Pero segun Segula, como un persona cu ta stima pushi, e tabata dunanan di come, paso e tabata preocupa pa e pober bestianan no muri hamber.
E bisiñanan constantemente tabata keda reda Segula cu e ta kibrando ley, te un dia cu e oficialnan di husticia a cansa y a presenta e castigo di 10 dia tras di tralie pa Segula kende ta un dama di edad.
Segula no por a acepta e castigo di mas cu un siman, cera tras di tralie. Segun su persona e castigo cu nan a dune no por compar’e cu loke ela haci di solamente cria algun bestia cu tabata tin hamber y sigur si compar’e cu cuanto otro hende cu ta haci cosnan mas pio y no ta haya castigo.
Su yiu homber Dave Pawlowski, ta hopi preocupa pa su mama, cu mester bay sinta 10 dia tras di tralie. E tampoco no por kere cu su mama por a haya un castigo di prison di 10 dia, e ta un hende grandi y cera tras di tralie lo ta un trauma pa su mama, tur esaki djes paso e tin un bon curason.
Mientras tanto na merca a cuminsa cu un petitition pa yuda Segulo pa e no haya e castigo aki. Si nan lo logra no ta conoci ainda, paso Garfield Heights, cu ta manteniendo e ley aki cu ta asina controversial, no a ni reaciona ainda riba e desicion aki cu a causa hopi comocion nacional y internacional.