ORANJESTAD – Departamento di Asuntonan Economico, Comercio y Industria/IDEA como parti di Ministerio di Finanzas, Asuntonan Economico y Cultura a organisa un proyecto educativo pa e muchanan di entre 9 te cu 13 aña. E nomber di e proyecto aki yama “Kid$ BIZ Market II”, y a tuma luga na Departamento di Asuntonan Economico riba 29 y 30 juli 2019.
Den e proyecto aki e muchanan a ricibi educacion empresarial y e la yuda e muchanan reconoce oportunidadnan comercial. E muchanan a haya informacion di ki tur un negoshi ta encera, con pa maneha un negoshi y a stimula nan tambe por bira un futuro comerciante. Nan
a haya informacion tocante producto, cliente, plan pa negoshi, sistema, servicio, promocion y financiamento. Nan a siña con pa genera placa door di haci actividadnan comercial for di un edad hopi jong. Tur esaki nan a siña den e prome workshop di “Get kids started as entrepreneurs”, presenta door di sr. Dave Martinus, Certified Business Coach di e famoso compania ActionCOACH Aruba.
Den e di dos workshop “Bringing the SDGs to the kids: The World we want” presenta door di Sr. Marc Croes, Policy Advisor na Departamento Asunto Economico, seccion Sustainable Development Planning (SDP), a presenta tur e 17 metanan pa un bon desaroyo sostenibel pa Aruba y mundialmente (SDGs: Sustainable Development Goals). E muchanan a haya e oportunidad di kies cua meta nan ta haya mas importante pa nan y por a splica pakico nan a haya e meta ey importante. Di e manera aki nos ta apoyando nos futuro empresarionan y haciendo nan mas consciente di nos metanan pa un Desaroyo Sostenibel di Agenda 2030 di Nacionan Uni.
Sr.Ludwig Rasmijn y Sr. Randy Maduro di Departamento di Agricultura, Cria y Pesca Santa Rosa a presenta e di tres workshop “Making Agriculture ‘Cool’ for Kids: Kids Agripreneur in the making”. Nan a siña e muchanan planta un simiya y tambe con pa haci traspaso di un mata herbal pa otro pochi y tambe con pa cuidele. Den e presentacion nan a haya informacionnan hopi amplio y valioso tocante plantacion y con pa cuida un mata. Por a nota e felicidad di e muchanan ora cu nan tawata traha cu e tera di mata pa nan a planta nan mesun mata.
Den e di cuatro workshop “Discover and get to know our money-security features” presenta door di Sra. Kristel de Nobrega, Sra. Elmelynn Croes y Sra. Lisette Buckley di Banco Central di Aruba, e muchanan a siña hopi manera con pa reconoce e elementonan di siguridad di e biyetenan nobo di Aruba y con pa reconoce cu esaki por ta uno falsifica. Nan a siña e impresion di tactilidad halto, elementonan pa personanan cu deficiencia visual, strepi 3D cu movecion, inkt cu ta cambia di color, strepi briyante, marca di awa, registro transparente, micro-texto y imagenan y na final e impresion di luz ultraviolet. Tambe no a informa nan di e significacion di cada color riba e biyetenan di 10, 25, 50, 100 y 200 florin. Esaki tawata un workshop hopi educativo pa nos muchanan, mirando cu a introduci e serie nobo di e biyetenan dia 3 juni 2019. E serie nobo aki di 2019 lo reemplasa completamente e serie existente di 2003, cu ta actualmente den circulacion.
For di 28 februari 2018, IDEA a inicia e proyecto cu yama “Kidpreneur$ With Big Ideas” cu ta specialmente pa e muchanan cu ta bishitando e 9 ‘Traimerdianan’ na Aruba. Pa duna oportunidad na otro muchanan cu no ta bishitando ‘Traimerdia’, IDEA a dicidi di organisa un proyecto cu yama “Kid$ BIZ Market”, yena cu workshop y actividad nan cu por educa, stimula y inspira nan pa nan bira un futuro comerciante. E proyecto aki a inicia aña pasa den vakantie durante luna di oktober y a continua cu e segundo parti den vakantie grandi e aña aki. Aña pasa nos a logra haya 32 mucha y e aña aki nos mester a cera e registracion na e maximo di 31 mucha. E interes ta hopi grandi di parti mayornan pa e workshop riba tereno di ‘Entrepreneurship’ pa nos muchanan. Den e grupo aki nos tawatin muchanan cu ta yiu y nieto/a di comerciantenan grandi den nos comunidad. E meta di IDEA ta pa stimula y contribui na e formacion di futuro comerciantenan pa Aruba.
Na final di e proyecto, tur 31 participante a ricibi un certificado di participacion.
E intencion di e proyecto aki ta e.o. pa e muchanan por participa na e Kidpreneur$ Bazaar cu lo organisa pa fin di november 2019 door di Departamento di Asuntonan Economico/IDEA pa asina nan haya e oportunidad pa bende nan producto of servicionan cu nan mes a crea.
IDEA ta gradici tur su partnernan y presentadornan e.o. Departamento di Asuntonan Economico, ActionCOACH Aruba, Departamento di Agricultura, Cria y Pesca Santa Rosa, Banco Central di Aruba, Sr. Marc Croes, Sra. Clarina Geerman, Sra. Zulema Dabian-Erasmus y nos directora Sra. Maria Dijkhoff-Pita pa yuda haci e proyecto aki un realidad. Nos ta hopi gradici na Sra. Naline Heilbron di Ha’Bon Aruba pa e bunita regaldo pa nos presentadornan. Un regaldo sigur hopi di aprecia pa motibo cu e habonnan aki ta traha na man na Aruba door di personan special y cu hopi dedicacion y cu bunita detaye.
Tambe IDEA ta gradici Sra. Indira Tupez, Sra. Hannah Arends y Sra. Gerlin Wernet cu a yuda voluntariamente como juffrouw pa nos muchanan y tambe na tur e coleganan di DEZHI cu a yuda haci e proyecto aki un realidad. IDEA ta gradici inmensamente tur mayor cu a pone nan confiansa den nos y tambe na e muchanan pa nan participacion activo den nos proyecto di Kid$ BIZ Market II. Durante e dos dianan di e proyecto, IDEA por a nota cu Aruba tin hopi talento comercial entre nos muchanan.
Nos di IDEA ta desea tur e muchanan hopi exito cu nan creacion di nan producto of servicio pa nos siguiente actividad cual ta e Kidpreneur$ Bazaar cu lo tuma luga fin di november 2019.
Por sigi nos riba Facebook page @Idea-Aruba pa mas workshop y otro actividadnan di IDEA den futuro.