London, Inglatera: Blake Fielder-Civil, e ex casa di e conocido cantante britanico Amy Winehouse, ta exigiendo 8 aña despues di fayecimento Amy, 1 miyon pond for di e herencia di Amy Winehouse, esaki e media britanico The Sun recientemente a publica.
Amy a fayece na Juli 2011, na e edad di 27 aña, ela fayece pa motibo di un intoxicacion di alcohol.
E cantante no tabata tin niun testament traha, pa e motibo aki su mayornan a hereda su propiedadnan na balor di 3.5 miyon pond.
Segun Blake e tambe tin derecho riba un parti di e propiedadnan di su defunto casa. Pakiko ta te 8 aña despues di morto di Amy, ela bin ta reclama su supuesto derecho no ta conoci. Despues cu Amy y Blake a diborcia, Amy lo a paga Blake 250 mil pond, e montante aki a wordo paga manera un clean break, pa asina Blake no lo tin nada mas di exigi di Amy su fortuna. Si acaso esaki no tabata of no ta e caso, e ora ey so Blake lo por tabata of tin chens pa haya algo, esaki abogadonan a splica na The Sun.
Amy a conoce Blake na aña 2005, dos aña despues nan a casa y na 2009 nan a diborcia. Tata di Amy no tin nada bon di bisa di Blake, segun e tata, Blake no ta responsabel pa e morto di nan yiu, pero si e ta responsabel pa e adicion di Amy. Blake a siña Amy, usa Crack y Heroina.