Lo sigura tambe cu e abusonan no pasa mas den companianan estatal
Den vision di gobernacion di Prome Minister Evelyn Wever-Croes y di Gobierno di Aruba, integridad ta hunga un rol hopi grandi y importante. Den e plannan ambisioso di integridad, Gobierno a dividi esaki den 3 aspecto:
1.Bureau Integriteit; E oficina aki lo conscientisa riba loke por y kico no por segun reglanan di integridad tanto den sector publico como den sector priva. Tambe e bureau aki lo ta encarga pa ricibi e ‘meldingen’, reportahenan di cosnan cu ta bay bon pa loke ta integridad of kiebronan di integridad.
2.Integriteitskamer; E oficina aki lo ta encarga pa scrutina desicionnan grandi di Gobierno den entro otro destahonan publico.
3. Corporate Governance Code; Esaki ta reglanan di integridad cu ta aplicabel riba tanto sector publico como sector priva, refiriendo aki na companianan estatal di Gobierno y sector priva.
Ta conoci cu e gobierno anterior a abusa hopi di nos companianan estatal poniendo nan paga hopi gasto cu no tawata tin nada di haber cu e compania mes sino pa gastonan di gobierno mes. Un ehempel di esaki tawata pagonan haci pa nos compania estatal pa ministernan y nan hendenan biaha. Biahenan cu a resulta di no tin nada di haber cu e compania. Tambe nos compania estatal a paga un avion priva pa e Ex Prome Minister bula bay un caminda cu tampoco tin di haber cu e compania mes. Tambe nos compania estatal a paga demasiado hopi placa pa articulonan di e Ex Prome Minister den revistanan costoso pa cumpli cu e exigencia di e ex mandatario pa haya poco gloria den exterior.
Prome Minister Evelyn Wever-Croes: “Esakinan ta e cosnan cu Gobierno di Aruba a bisa cu mester stop y lo no pasa den e gobernacion aki. Y esaki nos ta logra cu e Corporate Governance Code y sigura cu e abusonan aki no pasa mas den niun gobernacion”.
Cu Corporate Governance Code, segun Prome Minister, lo logra tambe cu cierto institutonan lo no bira monster riba nan mes y hiba e pensamento cu ta nan mester haci tur cos sin tene cuenta cu e maneho di Gobierno. Un ehempel di esaki ta e caso di Lotto pa Deporte cu no por ripiti den futuro. Otro ehempel ta fundacionnan cu ta haya donacion-subsidio di gobierno, unda cu tin hendenan di gobierno ta supervisa, no por keda sin entrega nan cuentanan annual mas. Esakinan ta pa menciona algun reglanan cu ta bon mara den e Corporate Governance Code.
Banco Central ta esun cu e prepara e ley aki pa gobierno y recientemente a haci un presentacion na conseho di Minister. Durante e presentacion Banco Central a splica e aspectonan di e ley. Banco Central a indica tambe cu mester bin cu un comision pa monitoria consistiendo di Secretario di Algemene Rekenkamer, Director di Centrale Accountantsdienst Aruba y di diferente persona di peso den nos comunidad. E comision aki lo mester duna Gobierno conseho sea e ta ‘gevraagd’ of ‘ongevraagd’. Dus si Gobierno pidi conseho, e lo haya conseho y aunke cu Gobierno no pidi conseho pero e comision ta considera cu Gobierno mester haya conseho, nan lo duna e conseho tambe. Tur conseho duna lo wordo publica. Esaki lo trece grado di transparencia den nos comunidad na unda ta haci conoci tambe con e companianan estatal lo wordo dirigi.
“Cu esaki nos kier trece e confiansa bek cu e comunidad di Aruba mester tin den su Gobierno y den su companianan estatal. Nos mester por confia cu nos companianan estatal ta tuma e miho desicionnan pa e comunidad di Aruba”, Prome Minister a expresa.
Prome Minister ta sumamente contento cu Banco Central a entrega Gobierno e ley aki y awo Gobierno lo cuminsa prepara e plan di implementacion. Tin hopi trabou ainda cu mester wordo haci prome cu tur hende ta riba mesun linea. Lo cuminsa pa haci un inventarisacion pa analisa con grandi e gab ta entre e situacion actual y e situacion cu e ley aki ta describi. Despues lo traha un plan pa cada gab den compania y institutonan di Gobierno pa hunto introduci y implementa e ley aki na aña 2021. Pa companianan estatal, lo no warda asina tanto tempo pa cuminsa practica esaki, sino lo cuminsa haci esaki via un maneho adelanta.
“Mi ta sumamente contento y satisfecho cu e paso grandi aki pasobra poco poco pero sigur mi ta mira cu e deseo cu nos comunidad tin pa cu integridad ta wordo realisa”, Prome Minister Evelyn Wever-Croes a expresa.
