Cuerpo di Bombero a manda un carta di preocupacion pa e cuater fraccionnan den Parlamento. Den e carta aki, cu tono hopi skerpi, ta menciona diferente topico cu ta preocupacionnan y cu ta tumando luga den Cuerpo di Bombero. “Lamentablemente mescos cu na otro departamentonan di Husticia e preocupacionnan aki ta existi den Brandweer tambe,” Parlamentario Robert Candelaria, cu a haya e carta aki tambe, a duna como reaccion.
E ta bisa cu “falta di prioridad y maneho ta un biaha mas ta puntonan principal di e carta aki.” Cuerpo di Bombero ta vocifera cu no tin planificacion di trabou, ni den termino corto ni a largo plaso den tur aspecto di nan servicio. Educacion y formacion di e management team, escogencia y adkisicion di material primordial pa Cuerpo di Bombero, falta di training como tambe falta di mantencion di material ta algun di e puntonan. Tambe a cuestiona den e carta aki e motibo y escogencia di cursonan na Merca mientras Cuerpo di Bombero di Aruba ta atene su mes na otro codigo / otro normanan di un sistema, cu ta esun Hulandes, cu nan mester traha cun’e.
Tambe nan ta preocupa pa e forma con ta inverti e fondonan, cu den Gobierno t’asina limita, y ta mira cu den Brandweer tampoco tin prioridad ni transparencia y cu ta e forma consistente di e escogencia robes na momento cu tin cu inverti.
Parlamentario Robert Candelaria ta menciona algun di e puntonan cu den su opinion ta algun di esnan mas importante cu e Minister tin cu adresa rapidamente, cual ta e falta mantencion. Den e carta cu Cuerpo di Bombero a manda ta menciona varios truck, incluyendo algun na Aeropuerto cu ta di sumo importancia pa cumpli cu e Grade / Standard internacional cu nos aeropuerto tin actualmente. Si pais Aruba no por garantisa esaki pa falta di mantencion y/o training na aeropuerto, specificamente e trucknan, ta trece un riesgo cu por “down grade” aeropuerto di Aruba.
Locual cu por saca afo di e carta aki den su totalidad ta cu e liña completo ta indica cu e prioridad no ta cla of no t’ey mes, falta di direccion, falta di maneho di minister pa cu / y den e Cuerpo di Bombero mes ta indiscutibel.
Pa finalisa Parlamentario Robert Candelaria ta haci un yamada na Minister Bikker pa atende cu e problematicanan rapidamente p’asina cuida nos Cuerpo di Bombero tanto na aeropuerto como e Cuerpo completo mirando cu esaki ta e esencia di nos economia, nos turismo, cu ta algo cu nos no por permiti na e momento aki pa nos baha di Grading pa falta di mantencion. A tuma contacto cu varios miembro di Cuerpo di Bombero p’asina conoce e origen di locual ta e contenido di e carta y lamentablemente ta e berdad cu ta bibando actualmente y e urgencia ta grandi pa e minister atende cu esakinan, garantisando e nivel, uzando fondo na bienestar di e Cuerpo y zorg pa e maneho y opleiding di esnan cu ta haya funcion den Cuerpo di Bombero tin esaki, sa nan trabou y por dirigi manera mester ta.
“Feestvierend ten Ondergaan” na Cuerpo di Bombero.
Apreciable lector:
Tur hende por corda cu durante e gobernacion anterior, di AVP, e actual prome minister tawata zwaai cu e documento jama “Feestvierend ten ondergaan”. Ora tur hende a kere cu e actual gobierno sinta e “Feestvierend” lo termina, ata “Feestvierend ta continua na grandi den Cuerpo di Bombero. Hopi lo kier sa ta kiko ta celebra tanto asina.
E celebrasion ta e mal gastamento di plaka di pueblo sin presedente como sifuera ningun hende no tin nada di bisa, ta nos ta manda. Fiestando cu placa ranca for di sako di e pueblo trahador, dor di medidanan tuma pa e actual gobierno.
No por ta asina cu den tempo di austeridad un hefe di depertamento y su grupito, cu ta forma su cartel ta violando leynan, un tras di otro, esta no cumpli cu ley cu ta mandatorio pa tur empleado publico, dus tambe bomberonan. Ningun hefe di departamento ni tampoco Minister ta para riba ley. Loke kier bisa cu esaki ta cu den departamento di bombero no ta respeta e ley di e pocision huridico nobo: AB 2013 nr.63 den cua ta para skirbi entre otro cu tur miembronan di e cuerpo, te cu 55 anja, mester somete nan mes na keuring Fysico. Igualmente tampoco ta cumpli cu e keuring medico esta AB 1993 nr.13, esaki ja pa mas di 20 anja. Pregunta: cuanto bombero ta fisicamente y medicamente apto manera ley ta prescribi pa por cumpli cu nan tareanan responsablemente. Politiconan ta expresa tur ora cu ningun hende ta para riba ley, esey ta corecto y mester keda aplica tur momento y no solamente ora ta cumbini. Na cuerpo di bombero, e comandante, no ta aplicando e dos leynan ariba mensiona. Aparentemente e mes nunca no a pasa e dos keuringnan menciona y cu ta obligatorio pa ley. E dos incumplimentonan aki ta tumando lugar cu conosimento/aprobasion di departamento di Recurso humano mirando cu nan ta forma parti di e comision di evaluasion pa por hanja promosion. Aki por hasi comparashon cu e caso di Douane recientemente.
Mal maneho den e cuerpo ta andando pa añas caba debi na:
incapacidad pa maneha riba, diferente nivel. (Top)
Falta di educasion adecua manera prescribi den e posicion huridico.
Deliberadamente no a tuma personal educa riba nivel di HBO of mas halto.
Previlegia un grupito cu posision y/of promosion apesar cu nan no ta cumpli cu exigensia pa wordo promovi.
Previlegia un grupito cu palca di warda (volle continu) apesar cu nan NO ta trahando warda.
Previlegia un grupito cu “Piket toelage” innecesariamente.
Malgastamento di fondo publico pa un supuesto certificasion na Jacksonville, segun minister di Husticia y e Commandante, cu segun por a compronde no ta obligatorio, no ta nesesario y no tin un balor agrega mirando cu ta usa diferente procedura na esun di Aruba. Resultado di e certificasion aki ta un gasto grandi y innesesario. Hasta personal administrativo a viaja sin motibo, a para wak y a ricibi e mesun certificado di participasion.( Ki validez y confiansa un certificasion asina aki por tin). Entrenamento y capasitasion ta bon y nesesario pero den e caso aki mirando e situasion financiero y e contenido di e entrenamento sigur por a haci di otro forma cu lo a costa pueblo menos placa.
Ta mal gasta plaka den viahamento pa supuesto certificasion mientras e equiponan pa e bombero traha cune, pa añas ta den mal estado y ta sigui deteriora diariamente. P.e.: -Crash trucknan na aeropuerto (cu ta di vital importansia pa nos pilar economico) y e autospuitnan.
Mal uso di dienst auto fuera y den ora di trabow pa metanan personal pa cual pueblo ta paga. P.e.: personal tin di keda sinta mientras famia si ta wordo transporta.
Contrata un compania di limpiesa, unda un señora ta trahando, mientras tin 3 werkster den servisio di gobierno sinta den administratie.(ta hasi kiko?)
Un lista di rango cu conforme ley mester wordo publica tur aña no mas tarda cu 1 di maart, pa añanan no ta tumando lugar.
E forma di cumpramento di material ta cuestionabel incluso trucknan.
Un “Formatie Rapport” nobo a keda introdusi na 2014 y hunto cune tin descripsion di funshonnan pa cuerpo di bombero. Ambos ta demostra e falta di capasidad di esnan cu a hinke den otro y cu ta aproba pa DRH.
Na introducshon di e posision huridico nobo no a percura pa e recapasitashon debido di e personal cual a trese discrepansia entre nan y demotivasion. Despues di mas di 4 aña di introducshon di e posishon huridico a cuminsa bek cu capasitashon di personal pero awo sin instructornan cualifica y certifica y asina ki mes Departamento di Recurso Humano ta permiti promoshonnan tuma lugar. Te caminda cu a compronde departamento di bombero no a percura, durante añas, pa tin instructornan debidamente capasita y certifica tampoco. Durante capasitashon e Commandante no ta atene su mes na e cuerpo su reglanan y ta permiti oportunidadnan no reglamentario.( ta permiti Her examen riba Her examen contra tur regla) Capasitashon tin fecha di cuminsa pero no di caba, no tin planeamento debido.
A manda 5 persona prepara pa oficial di bombero, exigensia Academico, sin un selekshon transparente, resultado di escogencia ta cuestionabel, faboritismo a/ta hunga un rol riba capasidad. E departamento no a mehora of beneficia cu e regreso di 5 personanan aki encambio ta sigui bai atras. E preparashon aki ta dudoso mirando e durashon, e exigencianan pa participa, e nivel di esnan cu a participa y cu na final no a hasi examen pero si a wordo otorga un diploma.(no tin cijferlijst)
E departamento pa añas ta draai sin un plan di maneho anual y desishonnan ta wordo tuma “ad hoc”.
Esaki no ta “Feestvierend ten Ondergaan.?
Departamento di Bombero Aruba “QUO Vadis”
Bomberonan Preocupa
Cc: Frakshon di AVP
Frakshon di MEP
Frakhson di POR
Frakshon di RED