ORANJESTAD (AAN): E ultimo simannan Kiwanis Club of Aruba tabata activo cu ehecucion di diferente proyecto, unda cu e miembronan a demostra cu di curason nan mision ta pa haci un impacto den e bida di e muchanan na Aruba.
Un di e proyectonan aki ta ‘Bon Bista’ cu a duna e oportunidad na un grupo di 50 mucha pa haci examinacion di nan bista. Di e grupo aki tabatin 32 mucha cu e necesidad di un bril, y a haya esaki como regalo di cortesia di Aruba Vision Center.
E miembronan di Kiwanis Club of Aruba, durante tres diasabra consecutivo for di mainta tempran, a duna acto di presencia pa brinda e muchanan un desayuno y yuda cu e muchanan na momento cu nan a yega Aruba Vision Center na Super Food. Despues cu nan bista a wordo examina pa e grupo di experto di e optica, nan a pasa scoge e montura di nan gusto, for di e seleccion grandi obtenibel den e coleccion di bril di mucha. Sigur esaki tabata un di e momentonan cu mas e muchanan a encanta, ya cu hunto cu e ayudo di entre otro; e Presidente y e miembronan di Kiwanis Club of Aruba, nan a haya conseho cua bril ta pas mas cu nan cara y personalidad. E satisfaccion di mas grandi tabata pa mira e sonrisa y cara di alegria refleha den e spielnan, ora e muchanan tabata wak nan mes cu nan bril. Na final e muchanan a ricibi un “surprise bag” yena cu, juice, fruta, chips, mangel y buscuchi.
Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: sirbi e muchanan di mundo. Kiwanis Club of Aruba ta activo den e comunidad Arubano desde 1964. Pa mas informacion di Kiwanis Club of Aruba y of su actividadnan por acudi na www.kiwansclubofaruba.org of Facebook page Kiwanis Club of Aruba.