Aruba a perde un di su gran yiunan cu fayecimeno di Don Mansur. Tabata na añanan ochenta cu Don tabata na timon di nos ministerio di Asuntonan Economico. Esaki durante un tempo cu Aruba tabata pasando den un periodo di crisis cu te awe dia awe nunca mas Aruba a conoce.
Na 1986 pais Aruba a haya su tan anhela Status Aparte. Tabata despues di un lucha largo y ferviente cu e soño di e pueblo a bira realidad. Pero e sentimentonan tabata mixto. Alegria combina cu hopi tristesa, pasobra hustamente na e momentonan ey Aruba tabata pasa den su pio reto social-economico. E refineria a cera su portanan na vispera di Status Aparte, desempleo tabata grandi y un exodus sin precedente tabata tumando lugar.
E pais nobo Aruba tabata na rand di un bancarota. Asina ami como Prome Minister di Aruba a bin haya e situacion. Un situacion penoso pa pueblo cu tabata cargando e peso tambe di medidanan cu tabata afecta su poder di compra severamente.
Aruba tabatin mester di hendenan capaz cu conocimento y vision pa guia e pais nobo den su siguiente fase. Den Don Mansur, kende no tabata un politico y nunca a aspira pa ta un politico Aruba a haya un Minister di Economia sumamente competente pa hunto cu e team profesional di nos Gabinete yuda rescata Aruba y pone bek riba pia y haci Status Aparte un alegria total pa pueblo: nos ta baas den nos mes cas y nos a logra un desaroyo economico cu ta provee oportunidad y prosperidad pa un y tur. Pueblo a wordo alivia di e carga di medidanan y mira a su poder di compra fortifica. E Aruba Nobo a bira un realidad.
Don, un persona bon studia, integro y habil riba mas cu solamente tereno di economia. Nos a pasa dia y nochinan largo ta discuti, consulta cu otro, pone cosnan den balansa pa yega na loke nos tabata kier, esta haci di Aruba un lugar unda hende kier biba, traha y bin bishita, un pais prospero. Gobierno di e tempo ey a prepara un ‘Plan di Rescate’. Don tabata un figura clave den realisacion di e plan aki. Aruba y nos pueblo tin hopi pa bon motibo pa mira bek riba Don Mansur su servicio cu gratitude.
E tempo ey Aruba a conoce un desempleo di casi 40 % y un cantidad grandi di nos hendenan tabata bandonando nos isla. Pasonan tuma net prome cu e prome Gabinete di Status Aparte na momento di ciere di Lago a haci e situacion ainda mas doloroso pa pueblo y no tabata ofrece perspectiva. Como Prome Gabinete di pais Aruba nos mester a duna contenido na Status Aparte y na mes momento rescata Pueblo y Aruba for di e situacion penoso cu e tabata den.
Bou di e circumstancianan aki mester considera cu Don tabata un empresario respeta y no tabatin ningun necesidad di accepta un posicion politico den un tempo asina dificil. Su stimacion pa su isla a pone cu el a pone tur e posibel aspectonan negativo di e puesto un banda. E gobierno di e añanan ey cu Don como ministro di Economia a haci milagro y a rescata nos pais.
Te awe expertonan nacional y internacional ta considera e logro gubernamental di e tempo ey ehempel di e miho gobernacion posibel den un pais. Don semper a keda modesto y simpatico sin busca honor pa loke el a produci.
Don, un hende amabel cu un sabiduria grandi. Nos por a profundisa riba hopi tema cu ta crea e oportunidad di desaroyo pa un Pais y Prosperidad pa un Pueblo.
Mi lo keda recorda tur esaki cu hopi aprecio y mira bek cu gran orguyo con Don tabata parti di nos prome Gabinete cu a rescata nos pais y crea un Aruba Nobo. Cu nos amigo Don su alma haya sosiego eterno.
Mr. J.H.A (Henny) Eman
Minister President Aruba
(1986-1989; 1994 – 2001)