ORANJESTAD – Cu dos curso exitoso tras di lomba di Financial Freedom cu ta guiya cuidadanonan con pa sali for di debe, Lead2Success ta cla pa lansa su di tres curso. Un curso cu ta provee strategia clave, mustrando cua pasonan pa tuma prome, di acuerdo nan peso y influencia negativo y con pa continua pa eventualmente cancela tur debe.
“Actualmente, nos ta den un situacion na Aruba, unda debe, basicamente bira algo structural. Awo tin debe cu mester biba cu ne pa tin cierto logro, pero aki nos ta papiando di debenan cu no tin mester, y tin efecto di dañino riba nos bida financiero, tanto den nos presente y nos futuro. Esaki ta e tipo di debe, cu gran parti di ciudadanonan ta pega aden,” segun Entrenado Certifica di Finansas di Lead2Success, Sr. Francis Groeneveldt
“Memey di aumento drastico den costo di bida y poco aumento di salario, ciudadanonan cu kier bay dilanti, ta hayanan primeramente confronta cu situacion cu nan mester pensa strategianan con pa aumenta entrada extra for di otro fuentenan – pasobra e organisacion actual cu nan ta traha aden, tampoco tin espacio pa aumenta salario di nan empleadonan ya cu comerciantenan tambe tin hopi reto awendia – y ora ta yega e momento pa cambia cierto habito y pensa strategianan con pa sali for di nan debenan actual, nan no sa con of unda pa cuminsa.”
“Hopi hende ta core un carera mensual pa logra cubri nesesidadnan basico, memey di gastonan imprevisto of emergencianan cu ta aparece durante e luna. Ela bira un chaos caba, unda hende ta presta placa, creando otro debe pa paga debe, sinembargo, sali for di debe ta posibel. E ta ‘e’ punto unda mester cuminsa, hendenan simplemente mester di guiya y ayudo na un strategia cu ta funcciona y ta comproba caba,” Groeneveldt ta splica.
“Lead2Success a pone un programa den otro, titula Financial Freedom, unda e cursista ta haya e pasonan nesesario cu nan mester tuma, cu ta saca nan for di un bida di debe. E no solamente ta saca nan for di debe, pero ta educa nan y ta duna nan un cambio di comportacion. E ta un di e miho inversionnan, pasobra e ta trece un cambio, transformacion den bida di e persona y bida di su famia, pa semper. Y no solamente esey, y mi a yega di bisa esaki anteriormente caba, e no ta solamente un cambio di comportacion pa e hende, pero e ta un cambio di paradigma – e persona su manera di pensa – y cu ta automaticamente transferibel na tur cu cay bou di su conseheria, sea su yiunan, su famia, su ekipo, su esfera di influencia, o sea, e ta sin limite y e ta heredirario na generacionnan nos dilanti.”
Nos lo bay tin un anochi di introduccion – cu ta uno gratis – dia 23 di juli, 2019. Curso mes lo cuminsa dia 6 di augustus 2019. Esaki, lo tuma luga den sala di Hope Civic Center – situa riba di dos piso di Wendy’s Aruba/Cinnabon pa playa, for di 7:00 te cu pa 8:30 di anochi. Ta rekeri pa registra pa asiento via nan pagina di web www.lead2success.net of yama 5934543.