“Coops pa un trabao digno” ta e lema escogi e International Cooperative Aliance.
“Cooperativanan ta juda mantene empleo y ta promove trabao den tur sector economico. Pa medio di participación e miembronan tin un motivación pa
cambia nan bida, nan comunidad y e mundo “, segun presidente di I.C.A.
Cuanto empleo cooperativanan ta genera ta lew di ta algo marginal. Según calculacion recien e cooperativanan na mundo henter ta emplea o ta e fuente di entrada principal pa más di 279 miyon persona, casi 10% di e poblacion activo riba nos planeta.
Ultimo añanan International Labour Organisation – I.L.O. a mustra riba importancia di cooperativa como empresa unda cu e desaroyo humano y husticia social tin prioridad riba ganashi.
O.I.T. ta celebrando cien aña di existencia y a pone enfoke especial riba “Futuro di Trabao”. Den cuadro di esaki ILO y ICA hunto a organisa e conferencia
“Cooperativa y futuro di trabao” , dialuna 24 di Juni ultimo, net despues di e Conferencia Internacional di Trabao nro. 108..
ILO pa medio di Resolucion di 2002 no. 193 y Resolucion 2017 no. 202 ta recomenda gobiernonan pa fomenta, promove y sostene cooperativanan como empresa. Esaki particulamente ta ser splica den resolucion no. 193:
Gobiernonan mester:
Articulo 3. fomenta e desaroyo y fortalece organisacion cooperativa basa riba:
(a) e balornan di cooperativa: ayudo mutuo, responsabilidad personal, democracia, igualdad, equidad y solidaridad hunto cu un etica basa riba honestidad, transparencia, responsabilidad social y interes pa prohimo;
(b) e principionan di cooperativa cu ta e siguientenan: miembrecia ta boluntario y habri; maneho democratica door di miembronan; participacion economico di miembronans; autonomia y independencia; educación, formación y información; cooperación entre cooperativanan, y interes pa comunidad.
Diasabra awor, promer diasabra di Juli ta dia Internacional di Cooperativa proclama pa Nacionnan Uni 16 december 1992, 25 aña pasa.
E motibo di e dia ta aumenta consenshi riba cooperativa y balor di cooperacion.
Ta dia pa pensa riba cuanto nos por logra den cooperacion y cu espirito di cooperacion ta pone base firme pa trece solucionnan duradero, unidad y solidaridad.
Pa garantisa futuro di trabao y logra trabao digno y decente gobierno
lo haci uso di tur medionan na su alcance. Considerando experencia di ILO y
trabaonan importante desplega pa esaki, gobierno sigur lo tuma e recomendacion di ILO den consideracion y lo bai evalua con por fomenta y sostene cooperativa na nos pais.
