Dialuna prome di juli, na Panama tin e traspaso di poder entre e Presidente saliente y e Presidente nobo. Diadomingo anochi, Prome Minister riba invitacion di Presidente saliente, señor Juan Carlos Varela, a asisti na e cena di despedida di su periodo como Presidente. E traspaso di poder lo tuma luga dialuna na unda cu señor Laurentino Cortizo ta tuma e mando di Panama over for di e Presidente saliente. Prome Minister ta presencia e traspaso aki den nomber di Reino y di Aruba.
Prome Minister y su esposo a wordo ricibi pa Vice-Presidente di Panama alaves Minister di Relacion Exteriores di Panama, Isabel de Saint Malo de Alvarado hunto cu su esposo diadomingo na Cancilleria pa un recepcion di gradicimento pa e cooperacion.
Tabata presente tambe Rey di Spaña Felipe y Presidentenan di Peru, Guatemala, Bolivia, Honduras entre otro mandatarionan.
Manera costumber, probechando tambe di su biahe na Panama, Prome Minister lo reuni cu varios otro hefe di estado kendenan lo ta presente na Panama pa e traspaso presidencial. Esaki ta un oportunidad pa estrecha relacionnan cu e diferente paisnan y specialmente Panama.
Entre Panama y Aruba tin lasonan cu ta uni nos.
Un desaroyo cu Aruba ta trahando riba dje ta pa haci nos Free Zone mas exitoso. Panama den esaki ta un bon ehempel.
Otro desaroyo cu Gobierno kier bin cu ne pronto ta pa haci Aruba un Hub logistico tanto pa transporte maritimo como transporte areo na unda cu nos wafnan ta hunga un rol importante. Den conbinacion cu Panama, segun Prome Minister, Aruba por tin hopi mas benificio cu esaki.
“Tin hopi tema di negoshi, comercio cu lo haya atencion na Panama pa desaroyo di nos pais. Ta un orguyo pa mi pa representa Aruba y Reino na Panama pa traspaso presidencial”, Prome Minister Evelyn Wever-Croes a duna di conoce.
