Parlamentario Endy Croes ta splica cu tabata tin un siman hopi pisa tras di lomba. Entre otro tabata tin basta preocupacion di un grupo di maestronan di school. Preocupacionnan mas grandi tabata den e grupo di Traimerdia, SPO Sta Cruz y SPO Brazil, School Paso pa Futuro, VWO San Nicolas y MDC pa nombra algun. Mientras tanto Minister Lampe a anuncia algun decision cual a resolve e inkietudnan pa cu VWO San Nicolas y Paso pa Futuro pero a keda cu preocupacionan cu lo de mas.
Bishitanan na SPO y Traimerdia
Cumpliendo cu nos trabao como Parlamentario, Endy Croes, Edgard Vrolijk y Hendrik Tevreden a haci bishitanan extenso na SPO y Traimerdia pa asina pone nan mes mas altura di nan programa y nan inkietudnan y asina transmiti esaki na Minister President pa e tambe por tin un bista mas amplio. Segun Parlamentario Croes e punto di salida tabata semper pa scucha, compronde y yuda busca solucion cu tur partido por biba cu ne y mas cu claro trece trankilidad.
Decisionnan importante a cay
Diabierna durante ora di mainta tabata tin un Ministerraad unda varios decision importante a cay. Cuminsando cu SPO Sta Cruz lo keda Sta Cruz y lo amplia e curiculo pa uno di 4 aña. SPO Brazil a muda pa su edificio nobo y lo duna asistencia na rekisitonan cu falta pa acomoda e school completo. Practicamente esaki a trece trankilidad bek pa e SPO-nan. Ministerraad a tuma un decision enbista cu Traimerdia no ta parti di “formeel onderwijs” y den consulta cu Minister Lampe a traspasa e seccion Traimerdia pa Minister Glenbert Croes mirando e importancia di Traimerdia den e Crisis Social Plan. A tuma un decision pa bay bek na e plan original manera cu Traimerdia tabata y poco poco lo bay adapta esaki den consulta cu esnan encarga y esnan den field y asina tambe a trece e trankilidad necesario. No obstante cu na MDC ainda tin preocupacion lo monitor esaki tambe di cerca pa hunto por yega na solucionnan. Claro e minister tin tur e espacio y libertad pa hiba su vision y maneho.
Boluntad pa yega na solucion
Parlamentario Endy Croes ta termina bisando cu como Parlamentario banda di aproba presupuesto y debati y aproba leynan den Parlamento nos ta scucha y reuni cu masha hopi departamento y instancia y unda nos por sirbi como e “brug” pa yega na cualkier solucion nos lo percura pa haci esey na e mihor manera posibel den comunicacion cu tur partido envolvi. Ta gradici coleganan Edgard Vrolijk y Hendrik Tevreden pero sigur e disponibilidad di tur Minister den Ministerraad den consulta cu otro pa a yega na e decisionnan aki. Minister Presidente Evelyn Wever Croes cu a lidera esaki y e boluntad di entre otro Minister Lampe den e proceso aki. Un palabra di pabien na e maestronan .