Piedra Plat: Diasabra algo prome cu 4’or di marduga, presencia di polis a wordo pidi na altura di e gasstation na Paradera pa un homber cu aparentemente lo tabata muri di calor y a dicidi di kita su paña y keda na jockey.
Mesora a manda un patruya di polis na e sitio pero na altura di Bright Bakery na Piedra Plat, e patruya di polis a bin topa cu enberdad un homber bisti unicamente cu un boxer cora canando riba caya.
E agentenan mesora a acerca e homber y a puntre dicon e ta canando na boxer rond y pa e bisti su paña, pero e homber no tabata sa unda su pañanan y sapato a keda. Aparentemente despues cu e homber lo a dal un of otro substancia basta fuerte, ela cuminsa haya hopi calor y pa e motibo aki ela kita su paña y sapato, kedando na boxer.
E homber bou influencia aki tabata canando den su boxer cora bayendo direccion di su cas. E agentenan policial como bon samaritano a yude busca su pañanan y na altura di e gasstation na Paradera, nan a bin topa cu su pañanan. Mirando den ki situacion e homber tabata, e agentenan policial a opta pa no lague su so riba caya pero nan a dune un lift pa su cas y asina evita cu e ta keda riba caya y por a haci su mes un daño grandi.
