ORANJESTAD – E aña aki un biaha mas Comision Celebracion Dianan Nacional, hunto cu Ministerio di Minister di Finansa, Asunto Economico y Cultura y Departamento di Cultura Aruba ta a informa cu nan ta den full preparacion pa cu e Celebracion di e Fiesta di San Juan “Dera Gay” cu ta dia 24 di juni benidero
Manera tur aña e tres instancianan aki ta trahando hunto pa asina trece tanto actividad y informacionnan pa tanto nos scolnan preparatorio y basico, pero tambe pa nos pueblo di Aruba, pa asina inculca den nos hobennan nos parti folklore y cultural, un di nos tradicion y celebracion mas bieuw y cu ta ser celebra rond Aruba den tur bario.
E aña aki a traha ariba un boeki di storia cu tocante di e fiesta di San Juan y cu ta Titula “Shon Wantomba” y e celebracion di Dia di San Juan, unda cu durante di un bishita na tur e scolnan rond Aruba, Departamento di Cultura Aruba lo parti esakinan hunto cu e wantomba y e gay, cu ta e figuranan principal di e historia den e boeki, den dje ta conta di e dos figuranan cu hopi biaha ta ser ilustra den e fiesta di San Juan cu ta e Gay, como e Wantomba, sigur un boeki cu lo haya hopi acohida y cu lo cay na agrado di nos muchanan, cada mucha di scol preparatorio y basico di eerste te cu derde klas lo ricibi esaki pa asina nan por siña mas di un parti di nos folclor y cultura, cu ta e fiesta di San Juan “Dera Gay”
Tambe nos por bisa cu e aña aki nos a ricibi dos peticion extra pa cu e celebracion di San Juan, cu ta Comision Dera Gay Rooi-Kochi di Savaneta y tambe Pro Juventud Savannah di Sabana Liber Noord y asina nos por bisa cu aña tras aña e celebracion ta creciendo mas y mas. CCDN di su banda ta hopi contento di por yuda y contribui cu e organisacionnan aki pa asina mantene un di nos fiestanan mas bieuw di nos folklore y tradicion.
Alabes nos kier a informa cu e siguiente luganan cu lo bay tin e celebracion di Fiesta di San Juan “Dera Gay” ta: S.V. Jong San Nicolaas, Centro di Bario Brazil, Comision Dera Gay Rooi-Kochi, Centro di Bario Tanki Lender, Fundacion Pro Juventud Savannah na Sabana Liber, Centro di Bario Playa Pabao, Club Huis Sport Boys, Centro di Bario Noord, Centro di Bario Ayo.
Nos kier a gradici tambe DOW y tur otro instancia cu a coopera cu un biaha mas nos lo bay celebra nos Fiesta di San Juan y “Dera gay” 2019
