ACURIL ta e abreviacion pa Association of Caribbean University, Research and Institutional Libraries. Anualmente e asociacion aki ta organisa un conferencia na diferente pais rond mundo y e aña aki Aruba a fungi como anfitrion.
Directora di Santa Rosa, sra. Nathalie Maduro tabata un di e oradornan invita durante e conferencia aki y el a amplia riba e importancia pa Aruba cuminsa na ta mas auto dependiente pa loke ta cuminda. E presentacion a inclui topiconan di interes local, manera scarcedad di awa, sistemanan innovativo, concientisacion y e diferente studionan cu Santa Rosa ta realisando. Un aspect di e presentacion cu a capta interes di tur esnan presente, tabata e parti di plantamento den escala chikito, sea ta den un hofi na cas of hofi escolar.
E caracteristica principal di e Conferencia Anual aki ta e desaroyo di un topico di interes pa e bibliotecanan y servicionan di informacion den Caribe. Durante e siman di e conferencia esnan cu a atende por a tuma parti di diferente workshop y seccionnan informativo relavante pa diferente sector den nos comunidad.
Santa Rosa, como Aruba su Departamento di Agricultura, Cria y Pesca, tambe a wordo invita pa forma parti di e programa, cual a duna nan e oportunidad pa comparti e diferente strategianan y plannan di maneho den nos Sector Primario. Aki a amplia mas riba e vision di Minister Chris Romero pa loke ta e motivacion pa Aruba por desaroya un Agricultura Sostenibel.
