ORANJESTAD, Aruba – E ley di destaho publico ta uno cu ta trahando riba dje desde aña 2012. Fraccion di AVP ta hopi contento cu e gabinete actual a sigui cun’e, pasobra e ta un ley importante. E ley aki ta pone e reglanan nobo pa loke ta trata destaho publico. Gobierno no a duna un fecha p’e ta na vigor, pero kier un tempo pa por prepara departamentonan riba esaki.
E excepcionnan pa bay den destaho publico tabata conoci bou di Comptabiliteidverordening di aña 1989, esta e ley di contabilidad, articulo 25 y 26 ta disparce. Di e forma ey e ta haci’e hopi mas transparente y e ta duna tur hende oportunidadnan igual, segun Parlamentario di Fraccion di AVP, mr. drs. Richard Arends. E ley ta hopi mas proporcional, pero tambe ta duna un siguransa na proveedornan di servicio na Gobierno.
Fraccion di AVP ta hopi contento y ta felicita na e departamentonan cu a traha den e ley aki, entre nan, Directie Economische Zaken, Directie Financien, Directie Wetgeving y Centrale Accountantsdienst. E ta un ley moderno y ta cumpli cu e obligacionnan internacional cu Aruba tin pa trata “Governemnt Procurement Act” di WTO, cu ta e organisacion mundial di comercio. Tratadonan cu Pais Aruba ta participe di dje for di aña 1992.
Pa loke ta e reunion mes desafortunadamente no a bay hopi riba e contenido, pero fraccion di AVP a asumi su responsabilidad y a duna un contribucion positivo. Tabata tin a varios reunionnan tecnico di e Comision Fiho di Asuntonan Economico y di Finanzas den e fase preparatorio pa e tratamento di e ley. Awe por mira atras riba un producto legal cu Pais Aruba por ta orguyoso di dje.
Parlamentario Arends ta kere na momento di implementa e ley aki debidamente e lo contribui na mas transparencia den uso di fondonan publico, pero tambe e reglanan ora di bay den destaho publico pa proyectonan di gobierno.
E ta un ley cu a cuminsa traha riba dje for di aña 2012 y desde aña pasa na juli e ta cerca Parlamento. A dura casi 1 aña pa despues cu e comision fiho a haya presentacionnan tecnico di diferente departamento. A haci preguntanan, a inicia tratamento di e reunion aki na oktober di aña pasa y esey a culmina despues di casi 1 aña cu e ley aki a yega Parlamento, unda a trat’e y aprob’e.
E ley aki no tin un fecha pa ta na vigor. A regla un parti so y gobierno a indica cu nan mester di 1 aña mas pa por prepara diferente departamentonan. Mester ekipa nan y tambe pa loke ta trata e proveedornan di servicio di producto pa splica nan kico ta e proceduranan nobo di gobierno. Fraccion di AVP a haci un yamada si na Gobierno pa cuminsa actua den linea di e spirito di ley.