Bonaire
Fundashon Nos Ke Boneiru Bek resientemente tabata na nos islanan ruman Korsow I Aruba riba un mishon di informashon I konsientisashon I en buska di sosten I solidaridat I tambe fondo pa kontribui den e lucha I trajekto pa pone Boneiru bek riba lista di Teritorionan-Sin-Propio-Gobernashon di Nashonan Uni.
Tantu na Korsow I Aruba a hiba kombersashonan fruktifero ku varios lidernan influensial I tambe organisashonan politiko I siviko sivil ku a mustra nan preokupashon pa e situashon alarmante di Boneiru despues di e kambionan estatal di 10-10-10. Na ambos isla loke ta basta remarkabel ta ku te awe ahinda, mayoria di suidadanonan di tur dos isla, ta bao di impreshon ku ta nos mes pueblo di Bonaire a skohe I ke loke nos ta sufriendo I pasando den awor. Apesar di esaki tog nan a sa di demonstra hermandat i kompashon I ku nan ta solidario ku e pueblo Boneriano I ku nan lo kontinua pa vigila di aserka e desaroyonan I tambe den futuro lo duna un man sigur kaminda nan por.
Na Korsou, NKBB ku e Movimentu Kousa Prome, enkabesa pa Sr. Rene Rosalia a logra konkretisa e akuerdo di koperashon ku a wordu inisia na dezember ultimo ku e meta pa uni forsanan I sigui traha huntu den e Caribbean Progressive Alliance (CPA). E CPA, Aliansa a wordu funda pa Sr James Finies, presidente di Fundashon Nos Kier Boneiru Bek, na Sint Maarten na maart 2017. Simultaneamente e organisashonan Brighter Path Foundation I Progresive Labor Party di Sint Eustatius I Independance Sint Maarten Foundation di Sint Maarten a join e Aliansa. Awe, Aruba, Bonaire, Korsou, Sint Eustatius, Sint Maarten, Archipelago San Andres, Providensia, Santa Catalina, U.S. Virgin Islands, Puerto Rico I Grenada awor ta miembronan.
E obhetivo principal di CPA ta pa sostene I kopera den e lucha pa outo-determinashon di e islanan. Ta obhetivo similar ku Kousa Prome ke realisa pa Korsou; ta pa sostene I kopera pa termina e sinku (5) leynan di Konsenso I pa respeta e vishon I espiritu di e Karta di Nashonan Uni di e mesun manera ku ta respeta e Tratado di Lisboa konserniendo Union Oropeo I pa implementa e Karta di Nashonan Uni pa outo-determinashon di nos pueblonan.
Na Aruba , NKBB a logra e mesun eksito pa amplia e frente di koperashon Antia I Karibense ku e organisashonan ; Grupo 7 , enkabesa pa Sr . Rocky Kelly I ku Plataforma Status Territorium , enkabesa pa Sr Orlando Croes. E metanan ku e organisashonan aki ke logra pa Aruba ta; – pa sostene I kopera ku otro pa evalua I si ta posibel ofrese e deskushon riba e posibel kambio den konstitushon di Aruba pa enforsa nos leynan Konstitushonal den Reino; -sostene I kopera pa demanda trato igual di Hulanda pa ku Aruba komo partner igual den Reino; – sostene I kopera ku pueblonan Karibenjo den nan lucha pa outo-determinashon I lucha kontra kolonialismo I tur sorto di deskriminashon den Reino Hulandes.
NKBB ta mira bek riba un mishon hopi eksitoso na nos islanan ruman Aruba I Korsou, I ta hopi orguyoso ku e frente di koperashon entre e islanan, e Caribbean Progressive Alliance, ta ekspandiendo I ta saliendo na interes di tur e pueblonan di nos islanan.
James Finies, presidente Fundashon Nos Kier Boneiru Bek
Cell/Whatsapp: 00599 782 5664