Un biaha mas, nos di San Nicolas Business Association a tuma nota, cu cada biaha ora ta toca desaroyo positivo pa San Nicolas y vecindario, entidadnan, gremionan, individuo y otro ta reacciona negativamente.
Ta fresco den memoria cu no mucho tempo pasa a presenta un Proyecto hotelero pa San Nicolas y por a nota questionamento, critica negativo y destructivo cual a casi bira un discussion Nacional, tanten pabou di brug monsternan di hotel ta lanta sin ningun problema!
Den pasado ora a presenta e proyecto di fast ferry for di e waf di O’stad (Playa), no a confronta ningun problema y esaki a wordo sosteni completamente.
Durante aña 2018 Minister di Transporte, Comunicacion y Sector Primario a presenta e plan di Fast Ferry na San Nicolas, adhunto San Nicolas Ports Authority and Development incluyendo e desaroyo di e tereno dilanti di San Nicolas cual ta awendia separa di e terreno di e refineria y bou e compania Refineria Di Aruba. Desde cu e projectonan aki y mas projecto pa San Nicolas y vecindario a wordo menciona, commentarionan di desaprobacion y strobansa a sali na abundacia.
San Nicolas Business Association ta desea di expressa nos sosten na e projecto di Hotel, Fast Ferry, Authoridad Portuario pa San Nicolas y e desaroyo di e tereno dilanti di nos ciudad.
Na principio di 2018 SNBA a presenta su National Transfomation Map y ta agradeci cu e acshon nan tumando luga, ta forma parti di e vishon aki.
Nos di San Nicolas Business Association kier pa Aruba su rikesa wordo parti na un manera husto, balanza y cu cada districto ricibi su parti equitativamente. Segun data collecta pa Centro di Estadistica ta refleha cu San Nicolas a pasa di ta e centro commercial di Aruba pa e districto cu mas desempleo, pobresa y cu economia den un spiral bayendo abou unda cu e tiki commercio cu ta existi, tin e chance di desaparece durante e proximo 6 luna!
SNBA a tin su reunion general cu tur Miembro unda a acorda riba un acshon urgente e inmediato pa salvaguarda nos comercio y existencia manera ciudad di Aruba.