Proteccion y siguridad di nos muchanan y esnan vulnerabel den nos comunidad tin e prioridad di mas halto pa Ministerio di Asuntonan Social y Labor como tambe pa tur partner trahando hunto den e tereno social. Desde inicio di Sociaal Crisisplan ta dirigi tur esfuerso pa traha den union y cooperacion pa asina yega na maneho specifo riba e tema di proteccion di tur mucha. Conseho di Minister a tuma un decision na luna di mei ultimo stipulando cu Bureau SosteneMi ta ser apunta como e meldpunt nacional cu lo fungi como punto di registracion di tur caso y preocupacion di abuso y negligencia di menor na Aruba. Esaki ta nifica cu desde 1 di juni 2019 tur instancia ta obliga pa registra casonan di abuso y negligencia na Bureau Sostenemi segun articulo 243 di e Codigo Civil nobo. Un otro tarea principal di e meldpunt nacional ta pa duna conseho na profesional y cuidadano cu tin preocupacion tocante abuso di un menor. Banda di esaki, den un cantidad di casonan, e punto di registracion ta investiga casonan pa clarifica si un forma di abuso ta tumando lugar y lo coordina e pasonan cu lo mester tuma siguientemente den bon comunicacion cu otro instancianan concerni.
Articulo 243 ta regula e definicion di un meldcode contra abuso di menor tambe. E articulo ta defini e meldcode como un plan di accion con pa actua ora un instancia ta haya señal di abuso of negligencia di menor. Tur departamento y instancia concerni lo traha un plan di accion specifico kiko mester haci den casonan asina. Pa medio di Sociaal Crisisplan ta trahando intensivamente cu tur stakeholder riba e tema aki cu ayudo technico di UNICEF y Augeo Foundation riba loke ta e preparacion y implementacion di e meldcode.
Ta importante pa sa kiko ta abuso di un menor. Abuso di menor ta ora cu un mayor, cuidador, famia of amistad sea pa accion of pa no actua, causa lesion, morto, daño emocional of riesgo di daño serio na un menor di edad. Tin hopi forma di maltrato di menor cu ta inclui negligencia, abuso fisico, abuso sexual, abuso emocional of explotacion di un menor. Si ta sospecha cu un menor ta wordo abusa den un forma of otro of ta desea di raporta un caso di abuso, yama e meldpunt nacional di Aruba: Bureau SosteneMi na telefoon 588-1010. Tur yamada ta gratis y por keda anonimo.
Gobierno hunto cu tur partners den Sociaal Crisisplan ta trahando intensivamente pa logra e meta principal di trece proteccion y siguridad pa tur mucha na Aruba. Responsabilidad di nos tur como un comunidad ta pa protehe nos muchanan.
