10 persona di nacionalidad Venezolano nan intento pa drenta nos isla ilegalmente a fracasa.
Situacion na Venezuela ta hopi alarmante y esaki ta pone cu e hendenan ta bira desespera, nan ta huy y ta trata na drenta Aruba ilegalmente, tin biaha nan por burla di autoridad, pero no ta tur ora, e biaha aki nan a faya.
Seroe Colorado, San Nicolas: Diadomingo den careda di 11’or y 15 di anochi, polisnan a haya un informacion cu un boto lo a baha algun persona indocumenta na altura di Santana di Cacho den Colony, mesora a manda polis den Colony.
Enberdad nan a topa cu 10 persona di nacionalidad venezolano, tratando na subi tera na un forma ilegal. Polis mesora a bay over na saca nan for di awa. E personanan aki tabata tin nan pertenencia (pañanan) bon cera den saconan di plastic. E polisnan na e sitio a piki esakinan pa despues entreganan nan pertenencianan.
E 10 personanan aki mesora a keda deteni y cu transportwagen di polis nan a wordo transporta pa warda di polis na San Nicolas, pa asina cu polis caba di tuma tur datos, nan lo wordo pasa pa Guarda nos Costa, cu lo mester prepara nan deportacion pa Venezuela bek.
Despues cu Capitan di e lancha a baha e 10 personanan aki na Santana di Cacho y tabata bayendo bek Venezuela, Kustwacht Caribisch Gebied a topa cu e lancha sospechso aki y mesora a detene e capitan, e capitan mes a confirma cu Kustwacht cu ela baha algun persona na costa di Aruba.
Na momento cu e ilegalnan tabata wordo hinka den transportwagen di polis, un di nan tabata grita, “esaki ta danki na Maduro”. E habitantenan di nos pais bisiña ta pasando den momentonan hopi hopi dificil y desde cu e frontera ta cera, pa esnan cu no tin hopi recurso, nan unico forma pa yega Aruba ta ilegalemente via lama. Otronan cu tin mas moda ta bin Aruba via Colombia of Panama.
Entrada ilegal via lama ta un riesgo hopi grandi cu hendenan ta tuma pa yega Aruba, algun ta bin cu e meta pa traha pa manda placa pa nan famianan, tin cu ta bin cu intencionnan no mucho bon y esakinan sigur Aruba no por tolera pa nan keda Aruba.