Durante e conferencia di prensa di diaranson ultimo, otro aspecto cu Parlamentario Sue-Ann Ras a trece dilanti tocante e situacion di Bureau Traimerdia tabata e parti di guia di huiswerk y lider di centro, e oportunidad di sigui crece como guia di grupo vs e cantidad di ora.
GUIA DI HUISWERK Y LIDER DI CENTRO
Tur cos a cuminsa cu eliminacion di guia di huiswerk (huiswerk begeleiders) y lider di centro (centrum leiders) aña pasa y e unico motibo cu e minister a uza tabata: baha presion di trabou di e maestronan. Ras: “Loke ta di lamenta si tabata, cu niun momento mes a bin cu un investigacion, rapport of encuesta relaciona cu esaki, pa deduci realmente cu esey ta e situacion y a bin cu un cambio di maneho completamente nobo, pa algo cu tabata funciona bon.” Huiswerk awendia ta keda un reto pa hopi mayor y Traimerdia ta percura pa brinda e ayudo aki na e mayornan. Ras a bisa cu ta inaceptabel pa kita esaki for di e sistema, tanten cu ainda nos enseñansa regular ta keda duna huiswerk. Si den futuro nos sistema completo cambia y realmente e muchanan no ta haya huiswerk mas, e ora bo por bisa cu un guia di huiswerk no ta necesario mas.
OPORTUNIDAD PA CRECE
Minister a presenta un bunita proyecto riba papel, relaciona cu oportunidad pa sigui crece como lider di grupo y bira un asistente di klas of enseñansa. Esaki sigur ta di aplaudi, pero niun momento so, esaki tabata loke e trahadornan tabata desea primeramente. “Un pregunta cu sigur ta haya mi atencion ta, kico ta pasa cu Traimerdia, si tur e 62 trahadornan dicidi pa tuma e oportunidad aki? Pues ta un forma indirecto pa indica cu no tin interes den Traimerdia, mientras esey no ta e indicador exacto cu ta midiendo kinan? Of ta un morto natural, cu kier culpa riba otro? Si Traimerdia tin lista di espera, e ta funcionando cu hende cu tin interes y pasion pa e trabou, no ta mihor sinta na mesa y dialoga y asina yega na mihor structura y crecemento pa henter e sistema? Y riba dje ta keda e pregunta di presupuesto, cu sigur ami lo cuestiona. Pasobra a pasa presupuesto pa Traimerdia caba, pues kico y unda e placa aki lo bay?” Ras a enfatisa.
PART TIME JOB
“Na momento cu mi scucha cu ta buscando forma di hustifica como 7 ora y tur loke e lidernan di grupo ta haciendo sin tene esaki na cuenta, mi ta puntra mi mes, con por ta posibel cu no por a dialoga riba e aspecto aki?”, Ras a expresa. E presentacion cu e parlamentarionan a haya den comision fiho di enseñansa, unda a indica tur e orarionan y con den nan oranan liber, nan ta haya nan ta haci diferente aspecto di trabou, cu ta concerni bienestar general di e muchanan, ta mas cu suficiente argumenta pa yena e orananan cu nan ta pidi. Ras a sigui bisa cu: “Minister a indica cu tin un tendencia pa bay den part time job, pero te unda cu ami sa, niun momento so, no por considera e trabou aki como un part time job y ta un falta di respet pa e trahadornan e expresion aki, mirando cu nan ta hincando tempo, dedicacion y atencion na e problemanan social y di cuido cu nos muchanan ta enfrenta. Un mucha ora e sali di scol, e no por pone su problemanan un banda, djis paso e ta bay Traimerdia y eynan e mester ta liberal y disfruta di su opvang? Unda e logica di nos como adulto ta e ora pa pensa esey?” ta loke Ras a puntra.
Finalmente Ras ta haci peticion y apelacion na minister pa contesta e preguntanan y bin cu tur documento necesario, pa asina por dialoga y structura kico ta mihor direccion pa bay cu Bureau Traimerdia y asina garantisa cuido y guia di calidad na nos muchanan.